Francezët janë thirrur sërish sot, për të 11-tën herë që nga janari, për grevë dhe protestë kundër reformës së pensioneve të promovuar nga presidenti Emmanuel Macron, në një atmosferë gjithnjë e më të tensionuar mes sindikatave dhe qeverisë.
Komiteti ndërsindikal shpreson në një mobilizim masiv ndërkohë që qeveria pret vendimin e Këshillit Kushtetues, i cili do të vendosë më 14 prill për kushtetutshmërinë e kësaj reforme jopopullore. Autoritetet parashikojnë se protestat do të jenë më pak masive se ato të mëparshme.
Plani i Macron, i cili përfshin kryesisht rritjen e moshës së pensionit nga 62 në 64 vjeç, u miratua më 20 mars pas javësh protestash dhe debatesh të pafrytshme në Asamblenë Kombëtare. Për miratimin e tij u përdor një mekanizëm kushtetues që e lejonte pa votën e parlamentit. Rezultati ishte përkeqësimi i marrëdhënieve midis kreut të shtetit dhe partnerëve socialë, veçanërisht konfederatës reformiste të punës CFDT.
Një takim i djeshëm mes kryeministres Elizabeth Bourne dhe ndërsindikatës – që numëron 8 sindikata – nuk solli rezultate dhe sindikatat folën për një “dështim”.
Problemet pritet të jenë më të vogla se në ditët e mëparshme të mobilizimit, kryesisht në transport, por lodhja vihet re tek qytetarët që i përdorin. Më 28 mars, ditën e mëparshme të aksionit, 740,000 protestues në të gjithë Francën, sipas ministrisë së brendshme, “më shumë se dy milionë”, sipas sindikatës CGT, kishin marrë pjesë në mobilizim.
Këtë herë autoritetet presin që të marrin pjesë 600,000 deri në 800,000 njerëz, 60,000 deri në 90,000 prej tyre në Paris. Do të mobilizohen 11 mijë e 500 policë dhe xhandarë, pasi incidentet ndodhën në marshimet e fundit. /albeu.com
