Franca voton sot në një nga zgjedhjet e saj më të rëndësishme në vite, me të djathtën ekstreme që shpreson për një fitore historike, por ngërçi politik është rezultati më i mundshëm.
Kjo është hera e parë që Tubimi Kombëtar kundër imigracionit (RN) i Marine Le Pen dhe Jordan Bardella, ka pasur një shans realist për të drejtuar qeverinë dhe për të marrë kontrollin e plotë të Asamblesë Kombëtare.
Por pas fitores së Le Pen në raundin e parë në zgjedhjet e parakohshme parlamentare të dielën e kaluar, qindra kandidatë rivalë u larguan për t’u dhënë të tjerëve një shans më të mirë për të mposhtur të djathtën ekstreme.
Votimi në Francë fillon në orën 08:00 (06:00 GMT) dhe sondazhet e para do të publikohen 12 orë më vonë.
Cilido qoftë rezultati, është e vështirë të shohësh Presidentin Emmanuel Macron të dalë nga ky pus.
Katër javë më parë, ai tha se ishte zgjidhja përgjegjëse për të thirrur një votim të parakohshëm në përgjigje të fitores së partisë së Marine Le Pen në zgjedhjet evropiane.
Zgjedhjet me dy raunde erdhën si një tronditje, për një vend që po përgatitej për fillimin e Lojërave Olimpike të Parisit më 26 korrik.
Siguria ishte tashmë e rreptë dhe tani 30,000 policë janë vendosur në këtë periudhë tensioni të shtuar politik.
Ka frikë nga dhuna në Paris dhe qytete të tjera franceze, pavarësisht nga rezultati i votimit, dhe një protestë e planifikuar jashtë Asamblesë Kombëtare të dielën në mbrëmje u ndalua.
Në Dreux, një qytet i vjetër historik në rrugën për në Normandi, votimi i së dielës bie në ditën kur flaka olimpike po kalon.
“Për ne është një gjë masive, më e madhe se zgjedhjet”, thotë Pauline nga një zyrë turistike.
Flaka ka udhëtuar rreth Francës, për gati dy muaj dhe Dreux ka planifikuar një fundjavë festash për të shënuar mbërritjen e saj.
“Macron duhet të kishte pritur deri pas Olimpiadës”, tha Antoine banor i Dreux për BBC.
Komentatori veteran Nicolas Baverez, beson se presidenti Macron jo vetëm që ka hedhur në erë mandatin e tij në detyrë dhe ka hapur portat e pushtetit gjerësisht për të djathtën ekstreme.
“Ai ka kompromentuar drejtimin e Lojërave Olimpike të Parisit 2024, gjë që mund t’i japë një goditje përfundimtare imazhit të Francës”, shkroi ai në Le Point në prag të votimit.
Zona elektorale që përfshin Dreux, është një nga garat për t’u parë në raundin e dytë të këtyre zgjedhjeve.
Kandidatët si Marine Le Pen dhe Jordan Bardella, kanë fituar tashmë vendet e tyre, duke fituar më shumë se gjysmën e votave. Por 500 gara të tjera janë duke u vendosur në balotazh, kryesisht duke përfshirë dy ose tre kandidatë.
