Hetuesit kanë dalë me detaje të reja rreth vrasjes së shqiptarit Artur Tushi, 44-vjeç, i cili u qëllua me armë zjarri 11 herë në tetor të vitit të kaluar, jashtë qendrës tregtare Santafé në Medellín, Kolumbi.
Sipas hetimeve, autorët e sulmit dyshohet të jenë pjesë e grupit kriminal “La Oficina Premium”, një organizatë që synon persona të huaj me status të lartë në Kolumbi dhe qytete të tjera të vendit.
Tushit i është dhënë fund jetës në një atentat që dyshohet të ketë lidhje me aktivitetet e tij në trafikun e qenieve njerëzore dhe narkotikëve, ku janë përfshirë grupe kriminale nga Shqipëria, Ekuadori dhe Kolumbia. Vrasja e tij besohet të ketë qenë një akt i planifikuar për të eliminuar aktivitetin e tij kriminal.
Ky rast është pjesë e një serie vrasjesh të të huajve në Medellín gjatë viteve të fundit, përfshirë vrasjet e një meksikani, një amerikani dhe dy kanadezëve.
Viktimat e tjera përfshijnë Horacio Pérez Ledezma, një tregtar meksikan, i vrarë në një restorant në sektorin Provenza të El Poblado, si dhe kanadezët Jonathan Christopher Acevedo García dhe Jesse Marcel Arrigo, të cilët u qëlluan në Mall del Indio dhe pranë Las Palmas Avenue.
Federico Gutiérrez, kryetari i bashkisë së Medellín, ka deklaruar se “La Oficina Premium” është një grup kriminal që operon ndërkombëtarisht, duke përfshirë vrasje dhe aktivitete kriminale në Meksikë, Republikën Dominikane dhe Kili.
Hetimet kanë zbuluar përdorimin e linjave telefonike ndërkombëtare, dokumenteve të falsifikuara dhe rrjeteve financiare për të fshehur aktivitetet e grupit dhe pagesat për ekzekutimet.
Për më tepër, hetuesit kanë zbuluar se anëtarët e këtij grupi kryenin rituale ezoterike përpara kryerjes së krimeve, duke sakrifikuar katër dhi dhe duke regjistruar ritualet për të bindur klientët për efektivitetin e operacioneve të tyre.
Për momentin, 9 anëtarë të grupit janë nën hetim për vrasje, trafikun e armëve dhe aktivitete të tjera kriminale, ndërsa autoritetet vazhdojnë hetimet për të zbuluar lidhjet ndërkombëtare dhe implikimet e plota të strukturës së “La Oficina Premium”./Infobae
