Detajet të reja janë zbardhur nga vrasja e bujshme e mbrëmjes së sotme në Elbasan, ku gjeti vdekjen Edmond Mëhalla.
Biznesmeni u qëllua me dy plumba në kokë, teksa ndodhej në një makinë pranë karburantit, biznesit të tij në Unazën Jugore të qytetit.
Rrethanat, shpjegojnë burimet, mbeten të paqarta, po ashtu dhe motivet. Gjithçka për momentin është mister.
Sipas gazetarit Elton Qyno, ngjarja e rëndë ka ndodhur në lagjen “Emin Matraxhiu” në Elbasan, 50 metra larg vendit ku ndodhi masakra e 4 shkurtit 2016, ku mbetën të vrarë 3 persona dhe 8 të tjerë u plagosën rëndë.
Të gjithë personat ishin anëtarë të familjes Çapja në Elbasan.
Mondi Mëhalla, është vrarë me dy plumba në kokë, teksa drejtonte një nga taksitë e kompanisë së tij.
E gjithë zona është e survejuar nga kamera dhe qarkullimi në këtë aks rrugor ku ka ndodhur ngjarja, ka qenë jashtëzakonisht e dendur.
Atentati duket i mirë organizuar dhe atentatorët kanë organizuar vrasjen, duke u larguar vetëm pasi janë bindur se personi ka ndërruar jetë.
Dyshohet se janë dy persona që kanë kryer sulmin. Ka dyshime se kanë lëvizur me një automjet. Fillimisht po merren në pyetje dëshmitarë okularë por nuk ka të dhëna konkrete, apo persona të dyshuar për ekzekutimin e Edmond Mëhallës.
Dyshimet po verifikohen për pista të mëparshme hetimore, me ndonjë konflikt të mundshëm. Nuk dihet se nëse i vrari ka patur konfliktet të mëparshme. Pritet të merren në pyetje dhe familjarë të tij./syri
Elbasan / Informacion paraprak
Rreth orës 20:35, është marrë njoftim se në lagjen “Emin Matraxhiu”, brenda në një automjet të parkuar, është gjetur, i vrarë me armë zjarri, shtetasi M. M. alias E. H., 43 vjeç.
Në vendngjarje shkuan menjëherë shërbimet e Policisë dhe janë ngritur pika kontrolli në dalje të qytetit, dhe vijojnë kontrollet në zonë e në ambiente të ndryshme, për kapjen e autorit/ëve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve.
