Bregu i Lëndinave, kullota më e madhe e fshatit Çërravë, mund të humbasë funksionin e saj për mbarështimin e blegtorisë dhe të kthehet në një park të madh për prodhimin e energjisë diellore. Bashkia e Pogradecit po planifikon ta ndryshojë statusin juridik të tokës, por banorët e kundërshtojnë ashpër pasi kanë lidhur jetesën me blegtorinë. Një ditë pas protestës në Këshillin Bashkiak, Report Tv bisedoi nga afër me banorët, të cilët thanë se do të mbrojnë me çdo kusht kullotat.
Vetëm 10 km nga qyteti i Pogradecit, shtrihet një pllajë e bukur ku kullosin delet, banorët e fshatit Çërravë.
Fshati numëron rreth 700 familje, shumica e të cilave mbahen me blegtori.
Vendasit e quajnë “Bregu i Lëndinave” dhe kullosin rreth 2000 krerë bagëti të imta dhe 110 lopë.
“Bagëtia këtu në këtë vend ka këtu e 30 vite që kullotet. Kullota kanë qenë dhe në diktaturë por në atë kohë quheshin ferma. Këtu kemi rezervuar për të vaditur tokat. Në të njëjtën kohë kthehen të na i marrim këto kullota. Bregu i lëndinave që janë lëndina për bagëtinë. Kjo është kullotë këtu. Shiko në krahun tjetër gropë e Llukanin që dhe atë na e kanë zënë. Nëse vjen dikush e mbjell s’ka kullota për ne. Janë dy mijë krerë që kullosin këtu. Është vetëm 2 km nga fshati”, thotë Genci Beshello.
“Merrem me mbarështimin e deleve. Ka 20 vjet që merrem me dele. Kam 170 krerë, me këto mbaj shtëpinë. Unë këtu i kullos delet dhe këta duan të na i marrin kullotat. Ta shohin çështjen ata të bashkisë, nëse marrin këtë vendim do i mbrojmë me të gjitha mjetet tona. Këto kanë qenë dhe do të mbeten të tilla. Ky vend quhet bregu i lëndinave që në kohën e Zogut. Kështu kanë qenë e kështu do mbeten, ne nuk do i lëshojmë lëndinat”, shprehet banori tjetër Lulzim Kapo.
“Kam 200 dele dhe i kullos në këto lëndina që bëhet fjalë për të na i marrë. Këta s’duan t’ia dine fare. I quajnë pronat e shtetit por ne nuk na quajnë banorë të këtij shteti. Nuk duan t’ia dinë fare. Për t’ia dhënë një njeriu të vetëm për panele duan të na marrin lëndinat. Po morën këtë ne s’kemi si të jetojmë këtu. Ne të gjithë jemi shprehur kundër, kemi hedhur dhe firmat nga gjithë fshati. Janë të gjithë kundër. Në rast se ndërtohen panele diellore, unë s’kam ku t’i çoj bagëtitë. Le t’i ushqejnë me korent pastaj se bar s’do ketë më. Kam qenë në emigrim, na thanë hajdeni jetoni në vendin tuaj por mundësitë na i heqin”, thotë një tjetër banor, Altin Kapo.
Së fundmi, Bashkia e Pogradecit ka paraqitur një projektvendim në Këshillin Bashkiak për të dhenë me qira sipërfaqen prej 35 hektarësh për ndërtimin e paneleve diellore.
Banorët, edhe pse nuk janë pronarë të tokës, thonë se e kanë shfrytëzuar prej dekadash për të kullotur bagëtitë dhe nuk do të lejojnë kurrsesi ndërtimin e paneleve në “Bregun e Lëndinave”.
“Merrem me mbarështimin e dhenve. I kullos në këto lëndina. Këto kemi të fundit që na kanë mbetur. Gjithë familja rron me këtë. Kam 280 dele, nëse hiqen këto kullota, ku do i çojme bagëtitë? Unë i kam stallat 600 metra larg. Nëse mendojnë të vendosin panele ne na mbyllet çdo mënyrë për të jetuar. Fshati ka 2500 krerë dele e dhi, ka dhe lopë. Nga marsi deri në korrik ne i kullosim gjithë ditën këtu, pastaj gjatë dimrit i mbajmë brenda. Ne duam që të vënë dorë në zemër, të mos na i marrim kullotat”, thotë Anis Dervishi.
“Unë kam 10 vite që merrem me blegtori, prindërit e mi janë marrë dhe më parë. Në verë i ushqejmë në këto lëndina, që duan t’i marrin për panele. Ne do detyrohemi të ikim. Jemi 20 vetë të rinj që i mbajmë bagëtitë. Do detyrohemi të ikim dhe ne. Ne e quajmë këtë zonë si zemrën e Cerraves. Të na thonë ku të shkojmë ne?! Të vijnë të na mbysin këtu në rezervat këtu. Se s’kemi asnjë të ardhur tjetër, veç me blegtori merremi”, shprehet Ervis Kapa.
Dy ditë më parë vendimi nuk kaloi në këshill, megjithatë Bashkia e Pogradecit nuk ka hequr dorë nga projektvendimi për dhenien me qira të 35 hektarëve në Cerrave, për 1 mijë euro për hektar/ në vit.
Ndërsa banorët janë të vendosur për të mbrojtur kullotat, pasi blegtoria është e vetmja mundësi jetese për ta.
