Stuhia tropikale Shanshan, solli shi të rrëmbyeshëm të dielën në zonën Shizuoka të Japonisë, 180 km (110 milje) në jugperëndim të Tokios, pasi zyrtarët e motit paralajmëruan se stuhia do të zgjaste edhe për disa ditë të tjera.
Shanshan, me erëra me shpejtësi 65 km/h (40 mph), arriti në tokë të enjten, duke shkaktuar rrëshqitje dheu, lumenj të përmbytur dhe mbeturina të shpërndara në rrugë.
Në Japoninë jugperëndimore, njerëzit ishin të zënë duke pastruar shtëpitë e mbushura me baltë dhe duke hedhur jashtë pajisjet e prishura.
Stuhia është lidhur deri më tani me të paktën gjashtë të vdekur, duke përfshirë tre persona të bllokuar në një rrëshqitje dheu.
Stuhia la një person të zhdukur dhe 127 të plagosur, sipas transmetuesit publik japonez NHK, i cili përpilon raporte nga qeveritë lokale.
Shanshan po levizte jashtëzakonisht ngadalë që nga mëngjesi i së dielës, tha Agjencia Meteorologjike e Japonisë.
Sipas agjencisë, ai shkaktoi reshje shiu në një zonë të gjerë, madje edhe në vende që nuk janë në rrugën e tij, siç është ishulli kryesor më verior i Hokkaido.
Çatitë e disashëpive u rrëzuan, ndërsa automjetet kalonin nëpër ujin me baltë.
Shanshan, fillimisht depërtoi nëpër ishujt jugperëndimorë japonezë të Kyushu dhe Shikoku, më pas arriti në ishullin kryesor të Honshu, duke u gjarpëruar në ujërat bregdetare në një pikë, por më vonë u zhvendos përsëri në tokë.
Paralajmërimet për rrëshqitje të tokës, janë lëshuar në pjesë të qyteteve Hamamatsu dhe Izu në prefekturën Shizuoka dhe Yokohama në Kanagawa, një qytet port pranë Tokios, si dhe në pika të rrezikuara në Tokio.
Tokio ditët e fundit pa qiell kryesisht me vranësira, të njollosura me momente reshjesh të papritura dhe intensive.
Njerëzve që jetojnë në zonat e rrezikuara nga rrëshqitjet e dheut, u është thënë që të evakuohen në stadiumet lokale dhe qendrat komunitare si masë paraprake.
Rruga e saktë e Shanshan mbetet e pasigurt. Pritet të lëvizë gradualisht në veri ditën e sotme, dhe më pas mbi Detin e Japonisë.
