Venezuela ka reaguar pas deklaratës së presidentit amerikan, Donald Trump, se hapësira ajrore mbi dhe rreth vendit duhet të konsiderohet e mbyllur.
Qeveria e Maduro-s i cilësoi komentet e Trump-it si një “kërcënim të organizuar kolonial” ndaj sovranitetit të vendit dhe të papajtueshme me të drejtën ndërkombëtare.
Më herët, në një postim në Truth Social, presidenti amerikan publikoi mesazhin paralajmërues: “Për të gjitha linjat ajrore, pilotët, trafikantët e drogës dhe trafikantët e njerëzve, ju lutem konsideroni HAPËSIRËN AJRORE MBI DHE RRETH VENEZUELËS TË MBYLLUR PLOTËSISHT.”
Gjatë muajve të fundit, SHBA ka rritur presionin ndaj Karakasit, si pjesë e një operacioni që synon rrjetet e trafikut të drogës dhe që, sipas administratës Trump, drejtohet nga regjimi i Maduro-s.
Ky paralajmërim i ri vjen ndërsa forcat amerikane po grumbullohen në rajon dhe Trump po shqyrton mundësi të reja veprimi kundër qeverisë së Nicolás Maduro-s.
Trump ka shmangur të saktësojë nëse dhe kur SHBA mund të nisë sulme ndaj Venezuelës, por ditët e fundit ka lënë të kuptohet se vendi mund së shpejti të zgjerojë sulmet kundër anijeve që dyshohet se transportojnë drogë dhe të ndërmarrë operacione tokësore, pa dhënë më shumë hollësi.
