Ministrja e Turizmit e Italisë, Daniela Santanche, ka dhënë dorëheqjen këtë të mërkurë, pas një kërkese nga kryeministrja Giorgia Meloni.
Largimi i saj vjen pasi një ditë më parë Meloni i kërkoi që të jepte dorëheqjen, ashtu siç bënë edhe dy zyrtarë të lartë të Ministrisë së Drejtësisë. Santanche është akuzuar prej kohësh për shkelje financiare dhe ishte vënë nën presion për të lënë postin.
“E dashur Giorgia, siç e keni kërkuar zyrtarisht, unë me anë të kësaj ofroj dorëheqjen time”, shkroi Santanche në një deklaratë, duke thënë se po largohej “vetëm në përgjigje të një kërkese nga udhëheqësi i partisë sime”.
Megjithatë ajo theksoi se nuk duhet të bëhet “kurban” për një humbje në referendum, “e cila sigurisht nuk ishte faji im”, ajo u shpreh se “nuk kishte vështirësi të thoshte ‘Unë bindem’ dhe të bënte atë që më kërkonit”.
Santanche anëtare e partisë së krahut të djathtë Vëllezërit e Italisë të Melonit, fillimisht i rezistoi kërkesës shumë të pazakontë publike të kryeministres. Sipas Kushtetutës së Italisë pas luftës nuk mund të shkarkojë drejtpërdrejt ministrat.
Ajo përballet me një proces gjyqësor për akuza të kontabilitetit të rremë në grupin botues Visibilia, të cilin e zotëronte më parë. Ndërkohë, prokurorët po shqyrtojnë edhe ngritjen e akuzave për mashtrim të dyshuar me përfitime shtetërore gjatë pandemisë COVID-19.
