Ushtria izraelite ka goditur depot e municioneve pranë Sidonit, në Libanin jugor , në përgjigje të lëshimit të një avioni pa pilot në territorin izraelit nga organizata Hezbollah, siç njoftoi zëdhënësi i forcave të armatosura ditë e sotme, shkruajnë mediat e huaja.
“Ne pamë një mjet fluturues pa pilot të Hezbollahut pranë Tiberias, i cili me sa duket kaloi kufirin dhe u rrëzua pranë Tiberias. Në përgjigje të këtij veprimi, ne sulmuam depot e armëve pranë Sidonit”, tha kundëradmirali Daniel HagarI.
Më herët kanë ndodhur të paktën dy sulme ajrore pranë qytetit Gazijeh në Liban, në afërsi të kufirit të Libanit me Izraelin, sipas dëshmitarëve okularë në zonë.
Izraeli po kryen sulme ajrore përgjatë kufirit në Libanin jugor kundër Hezbollahut, i cili lëshon raketa në zonat brenda territorit izraelit. Sulmet izraelite në territorin libanez në veri të kufirit janë shumë të rralla.
Dëshmitarët dëgjuan disa shpërthime të forta dhe panë dy kolona tymi të zi që ngriheshin pranë qytetit. Sipas mediave publike libaneze, sulmet erdhën nga Izraeli. Më shumë se 170 luftëtarë të Hezbollahut dhe gati 30 civilë janë vrarë nga sulmet izraelite në Liban që nga fillimi i luftës në Rripin e Gazës.
Javën e kaluar, sulmet izraelite në Libanin jugor vranë 10 civilë dhe shumë luftëtarë të Hezbollahut, duke përfshirë një komandant të forcave speciale Radwan. Udhëheqësi i Hezbollahut, Hassan Nasrallah tha se Izraeli do të paguajë “me gjak” për vdekjet e civilëve. Ministri i Jashtëm izraelit Israel Katz u përgjigj se Libani “do të paguajë një çmim të rëndë” nëse mjetet diplomatike dështojnë për të hequr Hezbollahun nga kufiri.
