Kancelari gjerman Friedrich Merz, i cili ishte në Uashington të enjten për vizitën e tij të parë në Shtëpinë e Bardhë, i ka dhuruar Presidentit Donald Trump një kopje të certifikatës së lindjes së gjyshit të tij të lindur në Gjermani, duke e ftuar udhëheqësin amerikan të vizitojë tokat e tij të paraardhësve.
I lindur në vitin 1869 në atë që atëherë ishte pjesë e Mbretërisë së Bavarisë, Friedrich Trump u rrit në Kallstadt. Gjyshja e Trump nga ana e babait, Elisabeth, lindi përballë shtëpisë së Trump në Kallstadt në vitin 1880.
Merz zhvilloi një telefonatë të parë me Trump menjëherë pasi mori detyrën në fillim të majit, gjatë së cilës ai tha se e kishte ftuar presidentin të vizitonte Gjermaninë, një ftesë që ai tani ia ka bërë publikisht.
Friedrich Trump u largua nga Kallstadt për në SHBA në vitin 1885, ku punoi si parukier, ndër të tjera, përpara se të bëhej shtetas amerikan në vitin 1892, duke ndryshuar emrin e tij në Frederick. Më vonë ai kërkoi të kthehej në Kallstadt, por zyrtarët vendas refuzuan t’i jepnin leje, duke përmendur dështimin për tu çregjistruar siç duhet kur ai u largua në vitin 1885.
Friedrich dhe gruaja e tij, Elisabeth, hipën në një anije me destinacion SHBA-në në vitin 1905, dhe babai i Trump lindi në New York vetëm disa muaj më vonë. Ndërsa Friedrich ndërroi jetë atje në vitin 1918.
Kallstadt u bë i famshëm ndërkombëtarisht gjatë kandidaturës së parë presidenciale të Trump në vitin 2016, kur mediat e kthyen vëmendjen nga fshati me vetëm pak mbi 1,000 banorë pas fitores së tij.
Gjatë një vizite në Shtëpinë e Bardhë në vitin 2017, kancelarja e atëhershme Angela Merkel i dhuroi Trump një gravurë bakri të vitit 1705 të një harte që përfshin fshatin ku kultivohet vreshtaria por presidenti dy herë i SHBA-së ende nuk e ka vizituar rajonin.
Përveç ndalesave në Bazën Ajrore Ramstein të ushtrisë amerikane, Trump e ka vizituar Gjermaninë vetëm një herë si president, për samitin e G20 në vitin 2017. Ndërkohë mbetet për t’u parë nëse Trump do ta pranojë ofertën e Merz.
