Hamasi thotë se mbetet i gatshëm të arrijë një marrëveshje gjithëpërfshirëse me Izraelin për lirimin e të gjithë pengjeve të tij, me kusht që lufta të përfundojë dhe forcat izraelite të tërhiqen nga Gaza.
Ndërkohë, Izraeli vazhdon përgatitjet për një pushtim të Gazës, ndërsa Presidenti Trump kërkon lirimin e menjëhershëm të pengjeve të gjalla.
Hamasi thotë se është gati të nënshkruajë një marrëveshje gjithëpërfshirëse shkëmbimi, sipas së cilës të gjithë të burgosurit armik të mbajtur nga rezistenca do të lirohen në këmbim të një numri të rënë dakord të të burgosurve palestinezë të mbajtur nga Izraeli.
Hamasi i referohet pengjeve si “të burgosur”, duke thënë se marrëveshja do të shënonte fundin e luftës në Rripin e Gazës dhe do të çonte në tërheqjen e të gjitha forcave izraelite nga zona. Përveç kësaj, Hamasi propozon krijimin e “një administrate kombëtare të pavarur teknokratësh” për të qeverisur Gazën dhe për të rivendosur infrastrukturën.
Nga ana e tij, Izraeli e ka bërë të qartë se është i gatshëm të pranojë një marrëveshje të tillë vetëm nëse Hamasi dorëzohet dhe pranon të çarmatoset.
