Rreth 250 fermerë dhe 20 traktorë protestonin sot jashtë ministrisë së bujqësisë në qendër të Madridit në pritje të një takimi me ministrin Luis Planas.
“Ne duam që produktet që kemi kultivuar gjithë jetën të kenë vlerën e tyre të vërtetë”, tha një fermer në protestë, duke kundërshtuar rritjen e kostove të karburantit, importeve te lira dhe kufizimeve mjedisore që ka vendosur BE e qeveria vendase ndaj prodhimit të tyre. Ashtu si në vende të tjera të Evropës, fermerët spanjollë vijuan sot presionin në Madrid duke akuzuar qeverinë ne pankarta se “po shkatërrojnë bujqësinë” dhe se “po i detyron fermerët të ndërmarrin akte dhune”.
Prej të mërkurës fermerët spanjollë kanë bllokuar rrugët me traktorë, kryesisht në jug të vendit dhe në rajonin e Katalonjës ku bllokuan një autostradë drejt Francës.
Sindikatat kanë planifikuar një protestë madhore para ministrisë së bujqësisë në Madrid më 21 shkurt dhe përsëri më 26 shkurt, për të koinçiduar me takimin e ministrave të bujqësisë në Bruksel.
Spanja konsiderohet si kopshti Evropës si një nga prodhueset më të mëdha të bllokut për sallatën, frutat e perimet, por tre vitet e fundit është goditur nga thatësira e pengesa të pazakonta të prodhimit.
