Presidenti turk Recep Tajip Erdogan deklaroi të enjten se plani i presidentit amerikan Donald Trump, për të zhvendosur palestinezët nga Gaza përbën një kërcënim të madh për paqen botërore.
Duke folur në televizionin indonezian Narasi, Erdogan iu drejtua planit të Trump për të larguar më shumë se 2 milionë palestinezë nga Rripi i Gazës, për të kërkuar kontrollin e SHBA-së mbi të dhe për ta kthyer atë në “Rivierën e Lindjes së Mesme”.
“Unë e shoh vendimin e Trump për të bërë një marrëveshje të tillë me një vrasës si Netanyahu dhe deklaratat e tij si një kërcënim të madh për paqen botërore. Për momentin, askush nuk mund ta largojë Gazën nga palestinezët.” tha Erdogan.
Presidenti turk shtoi gjithashtu se nuk i konsideron të sakta deklaratat e tij, që përbëjnë atë që ai e quajti “sfida për shumë vende në botë”.
“Shpresa ime është që gabime të tilla të kthehen sa më shpejt të jetë e mundur dhe që një gjigant global si Shtetet e Bashkuara të kthehet shpejt nga këto gabime në mënyrë që paqja globale të gjejë një mënyrë për të dalë”, përfundoi ai.
Bota arabe ka shprehur zemërim dhe fuqitë evropiane shqetësim të thellë për propozimin e presidentit republikan, që palestinezët duhet të zhvendosen nga Gaza përgjithmonë për të lejuar që ajo të zhvillohet si një pronë turistike bregdetare nën kontrollin e SHBA.
