Përplasje fizike të dhunshme kanë ndodhur në sallën e parlamentit të Serbisë, ku po diskutohej buxheti për vitin 2025. Tensionet nisën kur ligjvënësit e opozitës filluan të thërrisnin: “Vrasës, dorëhiquni”, me disa prej tyre që u përpoqën të ngjisnin postera me mbishkrimin “i keni duart të lara me gjak” në tryezën e kryetares së kuvendit, Ana Brnabiç.
Ky ka qenë dhe slogani i protestave të zhvilluara kundër qeverisë për ditë me radhë për tragjedinë që u mori jetën 15 personave nga shembja e një strehe prej betoni në Novi Sad. Pas vendosjes së posterave, ka pasur një shtyrje fizike nga deputetët e mazhorancës ndaj atyre të opozitës, ndërsa më pas kishte dhe rrahje me grushte.
Brnabiç thirri sigurimin për të ndaluar atë po ndodhte, por kaosi kishte pushtuar sallën. Ligjvënësit e pakicës përdorën dhe vuvuzela dhe mjete të tjera fishkëllyese për të bërë zhurmë. Ata kërkojnë shkarkimin e kryeministrit serb, Millosh Vuçeviç, dhe përcaktimin e përgjegjësisë politike dhe penale për ngjarjen në Novi Sad. Ligjvënësit e partive në pushtet, iu kundërpërgjigjen duke shpalosur një pankartë ku shkruhej: “hajdutët e verdhë duan luftë, Serbia do punë”.
Pas kësaj, deputetët e mazhorancës u larguan nga salla dhe kryeparlamentarja Brnabiç ndërpreu punimet. Ata u kthyen në sallë sërish, por situata nuk ndryshoi. Në një konferencë për shtyp, kryeparlamentarja Ana Brnabiç kritikoi deputetët e opozitës duke pretenduar se skena të tilla janë parë vetëm në vitin 2000 kur u dogj parlamenti.
“Disa njerëz në Prishtinë i dëshirojnë sjellje të tilla përfshirë edhe kryeministrin, Albin Kurti”, u shpreh ajo.
