Ministri i Brendshëm i Serbisë, Aleksandër Vulin, ka folur rreth qëndrimit të anëtarit boshnjak të presidencës së Bosnje Hercegovinës, Shefik Xhaferovic, për përmirësimin e bashkëpunimit në mes të Kosovës dhe Bosnjës.
“Të dy Xhaferovic dhe Kurti hanë bukë serbe, mendoj se kjo është arsyeja pse na urrejnë kaq shumë. Shpresoj që Bashkimi Evropian dhe komuniteti ndërkombëtar do ta dënojnë shpejt kërcënimin e Xhaaferovic ndaj paqes dhe stabilitetit në Bosnje dhe Hercegovinë dhe në rajon”, tha Vulin.
Vulin shtoi se është vështirë të respektohet një shtet që nuk respekton organet dhe politikën e tij zyrtare.
“Kur Xhaferovic takoi Kurtin dhe i premtoi bashkëpunim me shtetin e Kosovës, shkeli qëndrimin zyrtar të Bosnjës dhe Hercegovinës se Kosova është pjesë e Serbisë. Kushdo që dëshiron ta copëtojë Serbinë vështirë se mund të shpjegojë pse vendet e tjera nuk mund të ndryshonin kufijtë e tyre, veçanërisht Bosnja dhe Hercegovina”, përfundoi Vulin.
