Në një analizë, Lela thekson se kjo garë nuk është thjesht për drejtimin e kryeqytetit, por për përballjen, sipas tij me modelin autoritar të qeverisjes së Edi Ramës.

Lela argumenton se Lubonja, me historikun e tij të rezistencës ndaj diktaturës dhe betejës së gjatë kundër autoritarizmit, është kandidati më i përshtatshëm për të sfiduar Ramën në këtë moment kritik politik.

Ai e përshkruan Lubonjën si një zë i besueshëm, që mund të bëjë të qartë kontrastin mes qytetarisë së lirë dhe kontrollit të pushtetit të Ramës.

Alfred Lela: Gara për bashkinë e Tiranës nuk është, në fakt, për qeverisjen e qytetit, dhe as një sfidë për të treguar se, kush ka alernativën më të mirë në këtë degë të pushtetit lokal në Shqipëri, më të madhen në vend.

Është një garë për të demontuar Edi Ramën, sepse është një sfidë kundër tij, kundër mbipushtetit, diktaturës autokratike, epshit prej kafshe politike për të kontrolluar çdo kënd të çdo pushteti në vend.

Kush e sheh këtë si një garë të pastrimit, trafikut, karrikeve në trotuare, e pesë me hiçeve të tjerë, nuk bën gjë tjetër veçse e lejon Edi Ramën që ta shtrijë më tej edhe putrën edhe filozofinë e tij mbi kryeqytetin dhe Shqipërinë.

Është, pra, një betejë e filozofisë politike dhe urbane, e polity më shumë se policy, e political design më shumë se urban design.

Pasë thënë këtë, pa dashur me fyer askënd, nuk është betejë për asnjë prej emrave të paraqitur deri më tash.

Sepse, të gjithë kandidatët që kanë shprehur dëshirë, vetësakrificë apo dhe ata që janë tërhequr, nuk do të ndesheshin me Ogerta Manastirliun, por me Edi Ramën.

Në këtë kuptim, Partisë Demokratike i duhet të kthehet aty ku ka qenë njëherë. Në vitin 2003, kur përballë Ramës vetë, kandidoi Spartak Ngjelën, asokohe një nga njerëzit pranë Berishës, por jo një ‘besnik’, dhe një prej elokuentëve të opozitës. Jo tek Avokati, të kuptohemi, por te një i ngjashëm në profil publik, që e lufton Ramën nëpërmjet Edi Ramës, nga skutat e tij të ndërgjegjes e nënndërgjegjes, të së shkuarës dhe të së tashmes.

Këtë profil, më mirë se askush, e plotëson Fatos Lubonja.

Lubonja është, sigurisht, më shumë se kaq. Në një Shoqëri të Rrafshët, të cilën Edi Rama ka luftuar shumë për të montuar në Shqipëri, ai është një prej shumë pak relieveve të mbetura.

Ai ka burgun, rezistencën dhe mbijetesën kundër diktaturës në kurrikulën e jetës, ka betejën e ‘97 ës kundër Sali Berishës dhe të djathtës, dhe ka thuajse 2 dekada që lufton arketipin autoritarist të Edi Ramës, dikur mik i tij.

Në këtë kuptim, ai është një kandidat i rezistencës transversale dhe i qytetit horizontal, dhe Partia Demokratike, nëse don të jetë e ndershme me veten, nuk ka të ngjashëm në gjirin e vet.

Kandidatura e Lubonjës nuk është një përballja me Manastirliun, por kundër-kandidatura e Ramës. Lubonja e mund Ramën, sepse ai mund t’i bëjë publikut me dije, me anë të thellësisë dhe vërtetësisë së kontrastit, se kush është në të vërtetë Edi Rama.

Të tjerët do të përpihen nga vakuumi i poshtërsisë së ngritur nga vetë Rama dhe makina e tij propagandistike ‘ne nuk jemi më të mirët, por nuk ka më të mirë se ne’, apo ‘jemi të gjithë njëlloj, por të paktën unë jam argëtues’.

Partia Demokratike, me Lubonjën, del nga radhët e veta, por futet në qytet. I kam të qarta qindra buzët e rrudhura në pakënaqësi nga demokratët, por konteksti politik është i tillë, saqë paradigma nuk mund të jetë tjetër veçse ‘nëse nuk fiton dot PD, gjëja e dytë më e mirë është që dikush të mundë Edi Ramën’.

Sa i takon komunikimit publik, që është edhe shqetësimi i të nënshkruarit, Lubonja nuk ka nevojë të paketohet, të brandohet, të komunikohet. Ai është një zë publik i besuar, që tingëllon edhe për të majtët, edhe për gritë, edhe për demokratët, me të cilët prej një dekade ai ndan betejën anti-Ramë.

Në kushtet fatale të kohës së shkurtër për këtë përballje, kjo vlen sa nuk thuhet.

Lubonja është kandidati i duhur, edhe se gjendja e qeverisë dhe PS në Tiranë, pas burgosjes së Veliajt, pas 5D, pas inceneratorëve, është pikërisht ajo që ai ka përshkruar për vite me radhë. Teoria e tij e vjetër ‘e 2 bandave’, ku kishte parasysh dy partitë e mëdha, ka rënë, sepse tashmë ka vetëm 1 Bandë. Si qytetar dhe intelektual, është detyra dhe nderi i tij, që të angazhohet kundër Unibandës në pushtet.

Edhe nëse nuk e fiton bashkinë, kontrasti që ai do të sigurojë do të jetë portreti më i saktë i Edi Ramës dhe një telegram për fundin e pushtetit të tij.

Nuk kërkohet, pra, një ogert apo ogertë për Ogertën e Ramës, por një anti-Ramë, dikush që e bën duelin të duket i barabartë dhe i fitueshëm. Opozitës, në Tiranë, i duhet një duel, jo një lojë luftash në grup.

The post Alfred Lela propozon Fatos Lubonjën për kandidat të PD-së në garën për Bashkinë e Tiranës appeared first on Albeu.com.

Sipas artikullit të publikuar, Grenell është përpjekur që të përfshijë në agjendën e djalit të presidentit Trump edhe një vizitë në Tiranë ku të takonte kryeministrin Edi Rama.

Alfed Lela ka sqaruar për “Top Neës” se portali është në pronësi të një nënshtetasi amerikan dhe se ishte i marrë nga një tjetër portal që ka qenë dhe i cituar në fund të artikullit. Më tej ai ka vijuar të thotë se nuk ka qenë produkt i tij dhe se e ka fshirë menjëherë pas reagimit në rrjete sociale të Grenell.

“Lajmi është marrë nga një portal tjetër, i cituar. Kjo është historia. Z.Grenell nuk i njeh portalet në Shqipëri. Nuk e ka parë postimin në fund. Duke njohur politikën kaq më shumë. Është portali i një nënshteasi amerikan në Tiranë, këto janë arsyet pse ka reaguar Grenell.

Ka qenë një lajm i portalit në të cilin flitej për përpjekjet e Ramës për të patur akses te administrata Trump duke përdorur edhe lidhjet që ka Grenell me Shtëpinë e Bardhë. Më kishte bërë tag në Tëitter, unë e pashë, e vlerësova si të drejtë shqetësimin e tij.

Nuk mund të bëja gjë tjetër veçse të isha etik dhe ta hiqja, se nuk ishin burimet e mia. Unë e heq se produkti nuk ishte i imi. Unë e kisha marrë duke e cituar burimin”-tha Lela.

The post Djali i presidentit Trump dhe Grenell i përgënjeshtruan lajmin, reagon Alfred Lela: Është portali i një nënshtetasi amerikan, nuk ishte nga burimet e mia appeared first on Albeu.com.

Gjatë fjalës së tij para kolegëve gazetarë, Lela tregoi arsyet se pse i është bashkuar Rithemelimit të PD-së së Berishës, duke u shprehur se sipas tij nuk mjafton vetëm të flasë për hapjen, por kur i jepet mundësia ta realizojë vetë atë.

“Libri për të cilin po fliste z.Berisha është ‘Komunikimi Politik i Berishës në 90-92’ me të cilin unë edhe jam doktoruar.

Madje mund të them se kam në duar edhe një libër tjetër gjithashtu për doktorin, por tani më duhet ta ndërpres për të punuar për doktorin dhe me doktorin. Faleminderit z.Berisha, edhe për ftesën, edhe për fjalët e mira.

Së pari, kam një përshëndetje të përzemërt për ju të dashur kolegë, që duket sikur jeni në anën tjetër, duket sikur dikush ka ndërruar krah dhe unë i bie të jem ky.

Por megjithëse mund të jemi në anë të ndryshme të kësaj gjëje, prap misioni është i përbashkët: të flasim për të vërtetën dhe ta bëjmë këtë në mënyrë sa më të drejtë. Ky besoj do të jetë misioni ynë i përbashkët.

Shumë shkurt. Pse jam unë sot këtu? Pse i bashkohem projektit të Rithemelimit të PD-së, të z. SaliBerisha. Ne që bëjmë analiza politike, kemi kohë që flasim deri në përsëritje, deri në monotoni, hapje, hapje.

Është momenti që jo vetëm të flasim për hapjen, dhe ta jetojmë atë. Nëse nuk e bëjmë atë kur na vjen mundësia, por vetëm flasim, duket sikur jemi pak hipokritë.

Dhe unë kam dashur të dal përtej kësaj hipokrizie, me aq sa do të mundem, me aq sa do të di.

Dua të them edhe atë se çfarë do të mund të komunikojmë nëpërmjet kësaj zyre shtypi dhe të Komunikimit. Do të jetë thelbi i aksionit politik të PD-së, tek kauzat që janë të shqiptarëve, që janë të të gjithë neve dhe duan të përshkruajnë sa më mirë, një vizion të përbashkët të Shqipërisë dhe të shqiptarëve.

Dua sigurisht të mos e zgjas më shumë sepse ajo që do bëjmë do komunikojë se kush jemi dhe çfarë mund të bëjmë.

Dua të bëj edhe një sqarim sepse kam parë disa momente moskuptimi në shtyp. Unë do të jem drejtor i zyrës së Komunikimit dhe të Shtypit. Sepse është ngatërruar me zyrën e Marrëdhënieve me Publikun që e mban Jola këtu.

Ndërsa zonja Floriana Garo do të jetë zëdhënëse e Partisë, në krahune  djathtë të doktorit, një gjë që ajo s’do ta ndërronte me asgjë tjetër mesa duket.

Kështu që nuk ka duplime rolesh, ka vetëm unitet rolesh dhe punë të përbashkëta për të arritur qëllime të përbashkëta”- tha Lela.

Para se të fliste, Lela i mori mikrofonin Berishës pasi pajisja duket se nuk arrinte deri te vendi i tij.

Një moment që u kalua me batuta.

“Se të marrësh që në fillim mikrofonin tim nuk është mirë”, tha Berisha duke qeshur.

The post Rrëfehet Alfred Lela: Lashë librin që po shkruaja për Berishën për të punuar me të appeared first on Albeu.com.

Në nisje të konferencës për shtyp, Berisha tha se Lela do të vendosë standardet më të mira të transparencës në PD.

“Kam kënaqësi të paraqes para jush drejtorin e zyrës së shtypit dhe komunikimit në PD, publicistin, gazetarin e mirënjohur, Alfred Lela. Alfredi ka një karrierë të suksesshme në fushën e gazetarisë. Pas përfundimit të studimeve ka bërë një vit kualifikimi në Masachusets University, ka kompletuar doktoraturën me një libër, më interesantin e jetës së tij. Do të drejtojë këtë sector jashtëzakonisht të rëndësishëm për partinë dhe për publikun me qëllimet më të mira për të vendosur standardet më të mira të transparencës, etikës së PD-së”, u shpreh Berisha.

Nga ana e tij Lela u shpreh se “do të flasim për të vërtetën dhe do ta bëjmë në mënyrë sa më të drejtë. Pse i bashkohem projektit të Rithemelimit të Berishës? Ne që bëjmë analiza politike, kemi kohë që flasim për hapje, hapje, hapje. Nëse nuk e bëjmë dhe vetëm flasim dhe kur na vjen mundësia që ti kontribuojmë hapjes, tërhiqemi është pak hipokrite”.

Në këtë konferencë të parë në përfundim të fjalës së Berishës, Lela mori fjalën e bashkë me të edhe mikrofonin. Pajisja duket se nuk arrinte deri te vendi i Lelës dhe Berisha e kaloi përmes një batute thumbuese.

“Të marrësh që në fillim mikrofonin tim nuk është mirë”, tha Berisha, teksa Lela mori më pas mikrofonin e njërit prej gazetarëve pranë.

The post Berisha e prezanton si drejtor në PD, Lela i merr mikrofonin appeared first on Albeu.com.

Në një prononcim për Neës 24, Lela ka rrëfyer orët e tmerrit ku tha se ka parë vdekjen me sy. Ai bëri një rezyme të gjithë ngjarjes ku tregoi si moti i kishte “tradhtuar”.

“E kapëm majën, aty nisi një stuhi që frynte në dy krahët dhe na bëri të pamundur kapërcimin në anën tjetër të majës për t’u ulur në një drejtim tjetër. Era ishte e tillë saqë na merrte mbrapsht. U detyruam të iknim mbrapsht. Ishim pa fat, sepse era dhe i ftohti kishin mbuluar gjurmët duke e bërë uljen më të vështirë.

Në përpjekje për t’u ulur rrëshqitën 3 prej nesh, unë i pari. Me ndihmën e Zotit jam ndalur aty ku nuk mendoja se do të ndalesha më, mendoja se e kisha mbyllur me këtë botë. Më ka ndaluar një objekt pa shkuar në anën tjetër të shkëmbit. Kyçi besoj që është thyer, shpresoj të jetë ndrydhur. Na janë dashur rreth 1 orë për të zbritur sepse era ishte forcuar shumë nga i ftohti. Kjo është rezymeja.

Ne jemi grup që bëjmë ekspedita prej shumë vitesh. Ishim një grup miqsh që do të bënim ngjitjen e fundit të vitit e ndërkohë unë dhe kameramani po xhironim e filmonim”,  tha gazetari ndërsa akoma nuk ishte gjetur trupi i pajetë i alpinistit./albeu.com

The post “Pashë vdekjen me sy”, Alfred Lela rrëfen tmerrin në Munellë: Stuhia frynte nga dy krahët, ishim pa fat appeared first on Albeu.com.

Pas disa orësh kërkime dhe pas gjetjes gjallë të alpinistit tjetër, fatkeqësisht Mulaj u gjet i pajetë.

Ata ndodheshin atje për një reportazh së bashku me gazetarin Alfred Lela, por u rrëzuan papritur.

Ndërkohë policia po punon për zbardhjen e plotë të ngjarjes./albeu.com/

The post U rrëzua në malet e Pukës, gjendet i pajetë alpinisti që ishte me Alfred Lelën appeared first on Albeu.com.

Në njoftim zyrtar policia e Shtetit ka dhënë detaje në lidhje me ngjarje që ka ndodhur rreth orës 16:00 të pasdites së sotme.

Sipas bluve gjatë ngjitjes në këmbë dy prej alpinistëve kanë rënë nga lartësia duke përfunduar në humnerë. Pas dy orësh kërkime është bërë e mundur gjetja e I. Sh., rreth 30 vjeç ndërkohë që Mulaj vazhdon të jetë i zhdukur.

Policia po vijon kërkimet në zonë por operacioni i shpëtimit bëhet akoma më i vështirë për shkak të terrenit të vështirë, motit të ftohtë dhe errësirës.

“Policia e Pukës, shërbimet e zjarrëfikses dhe banorë të zonës i kanë ardhur në ndihmë disa alpinistëve. Sot rreth orës 16:10, jemi njoftuar nga shtetasi A. L., se ka qënë duke eksploruar në Malin e Munellës së bashku me 4 alpinistë amatorë.

Gjatë lëvizjes në këmbë 2 prej tyre, shtetasit N. M., rreth 60 vjeç dhe I. Sh., rreth 30 vjeç, kanë rrëshkitur duke rënë në humnerë. Menjëherë kanë nisur kërkimet nga shërbimet e Policisë, shërbimet e zjarrëfikses, pjestarë të shoqatës së alpinistëve Pukë të cilët janë ndihmuar dhe nga banorë të zonës.

Pas 2 orëve kërkimesh në një terren shumë të vështirë është bërë e mundur gjetja e shtetasit I. Sh., i cili po transportohet në spital për ndihmë mjekësore si dhe vazhdojnë kërkimet për gjetjen e shtetasit N. M”, njofton policia./albeu.com/

The post Për reportazh me Alfred Lelën, si ranë në humnerë dy alpinistët! Policia “zbardh” dinamikën e ngjarjes appeared first on Albeu.com.

Një grup alpinistësh, mes tyre edhe gazetari dhe drejtori i Politiko.al, Alfred Lela janë rrëzuar teksa ngjisnin malin e Munellës në Gjegjan të Pukës.

The post Çfarë ndodhi? U përfshi në aksident, flet për herë të parë Alfred Lela appeared first on Albeu.com.

Burime për albeu.com bëjnë me dije se 2 alpinistët që kanë qenë bashkë me Lelën kanë rënë në një humnerë.

Pas ndërhyrjes së forcave të policisë për nxjerrjen e tyre, njëri nga alpinistët nuk është gjetur. Kërkimet po vazhdojnë ende por gjetja bëhet akoma më e vështirë për shkak të errësirës dhe terrenit të vështirë.

Fatmirësisht gazetari Alfred Lela ndodhet në gjendje të mirë shëndetësore.

Ndërkohë nuk është e qartë nëse kemi të bëjmë me një aksident, apo me një incident ku alpunistët të kenë rënë nga lartësia gjatë ecjes në këmbë./albeu.com/

The post Aksidenti në Pukë, mësohet gjendja e gazetarit Alfred Lela, kush është i zhdukuri appeared first on Albeu.com.