Vrasja e Arlinda Zekajt nxit kërkesa për dorëheqje, Gërvalla dhe Sveçla mungojnë në Kuvend

Rasti i Arlinda Zekajt ka nxitur reagime të forta politike, pasi Këshilli Gjyqësor i Kosovës bëri të ditur se ajo kishte pasur urdhër mbrojtjeje, ndërsa aktakuza ndaj bashkëshortit u ngrit vetëm pas vrasjes së saj. Opozita po kërkon largimin nga detyra të ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla.

Kryeministri Albin Kurti dhe dy ministrat nuk janë të pranishëm në seancën plenare të sotme të Kuvendit të Kosovës. Përfaqësuesit e opozitës i lidhin ata me dështimet e institucioneve të rendit dhe drejtësisë për ta parandaluar vrasjen, ndërsa kërkojnë që Kurti t’i shkarkojë zyrtarët përgjegjës.

Lideri i LDK-së, Lumir Abdixhiku, tha në hyrje të Kuvendit se vrasja e Zekajt dëshmon dështimin e institucioneve në Kosovë. Ai kërkoi që përgjegjësia të shtrihet në zinxhirin komandues dhe në nivelin politik. Sipas tij, deklaratat pas tragjedive nuk mjaftojnë; për dhunën ndaj grave duhet të ketë përgjegjësi kolektive.

Deputetët opozitarë të pranishëm në sallë shprehën gjithashtu pakënaqësi. Blerta Deliu-Kodra e PDK-së tha se ishte tronditur nga veprimet e policisë në rastin e Pejës, ndërsa deputetja e LDK-së, Jehona Lushaku Sadriu, kërkoi reagim nga kryeministri.

Edhe Aleanca për Ardhmërinë e Kosovës u është bashkuar thirrjeve për dorëheqjen e Gërvallës dhe Sveçlës. AAK-ja ia atribuon Ministrisë së Drejtësisë përgjegjësinë për dështimin e strategjisë kundër dhunës. Për Sveçlën kërkon largimin, duke e cilësuar mënyrën si u trajtua rasti si “menaxhim fatal”.

Arlinda Zekaj, 49 vjeçe, u vra të dielën në Vitomiricë të Pejës. Një ditë më pas, Policia e Kosovës arrestoi kunatin e saj, i cili dyshohet se e ka vrarë.

Zbulimi se Zekaj kishte urdhër mbrojtjeje dhe se aktakuza ndaj bashkëshortit u ngrit me vonesë ka shtuar zemërimin e publikut. Rasti ka ngritur pikëpyetje për veprimet e policisë, prokurorisë dhe gjykatave.

Më 26 tetor, Kuvendi i Kosovës mbajti seancë të jashtëzakonshme lidhur me këtë vrasje, vrasjet e tjera të grave, dhunën në familje dhe përgjegjësinë institucionale.

Protesta e organizuar dje në Prishtinë nga Kolektivi për Mendim dhe Veprim Feminist mblodhi edhe familjarë të Arlindës. Pjesëmarrësit marshuan nga sheshi “Zahir Pajaziti” drejt Ministrisë së Drejtësisë, Këshillit Prokurorial, Këshillit Gjyqësor, Policisë dhe Qeverisë. Ata kërkuan dorëheqjen e Gërvallës dhe Sveçlës, ndërsa organizatorët paralajmëruan se protestat do të përshkallëzohen.

Një tjetër protestë për drejtësi për Arlinda Zekajn është njoftuar sot në Ferizaj, në orën 12:00. Marshimi do të nisë para ndërtesës së Komunës dhe do të ndalet pranë disa institucioneve publike.