Si synon Kosova t’ia shpjegojë BE-së ligjin për Dhomat e Specializuara?

Pas shqetësimeve të shprehura nga Bashkimi Evropian për ligjin e miratuar për Dhomat e Specializuara të Kosovës, përfaqësues politikë në vend kanë kërkuar koordinim mes institucioneve. Sipas tyre, nevojiten përpjekje për t’ia sqaruar Brukselit arsyet e ligjit, duke ruajtur njëkohësisht marrëdhëniet me aleatët ndërkombëtarë.

Deputeti i Lëvizjes Vetëvendosje, Artan Abrashi, tha se qeveria do të takohet me përfaqësues të BE-së për t’u shpjeguar qëllimin dhe arsyet e miratimit të ligjit për Specialen.

“Besoj se tash do të ketë takime të ndërsjella dhe do të sqarohen pozicionet dhe qëllimi i votimit të këtij ligji te partnerët tanë, BE-ja. Po ashtu, besoj se edhe PDK-ja, si sponsorizuese, mban një pjesë të përgjegjësisë për sqarimin e kësaj iniciative që tashmë është votuar. Uroj të gjejmë një gjuhë të përbashkët për këtë çështje”, tha Abrashi.

Deputetja e Partisë Demokratike të Kosovës, Ariana Musliu-Shoshi, ndërkaq, mbrojti të drejtën e Kuvendit për të vendosur në kuadër të përgjegjësive të tij. Ajo tha se Kosova duhet të vazhdojë bashkëpunimin me aleatët, por edhe se qëndrimi i BE-së duhet të marrë parasysh sovranitetin e vendit.

Sipas Musliu-Shoshit, ligji u miratua në Kuvend me më shumë se 80 vota dhe duhet të zbatohet.

“Kuvendi i Kosovës është zëri i popullit dhe është institucioni më i lartë që merr vendime, të cilat vlerëson se janë në të mirën e shtetit të Kosovës dhe qytetarëve të saj. Ne, pa miq dhe aleatë, asnjëherë nuk kemi pasur mundësi që të ecim përpara dhe të arrijmë objektivat e shtetit tonë. Vlerësoj se është e rëndësishme që të kemi një koordinim edhe për Dhomat e Specializuara. Sa i përket ligjit, ka kaluar me më shumë se 80 vota në Kuvendin e Kosovës dhe duhet patjetër që të implementohet. Duhet patjetër që BE-ja të na ndihmojë që e drejta për shtet sovran, e drejta jonë për të marrë frymë lirisht në këtë vend, të jetë parimore dhe të trajtohet me prioritet”, potencoi ajo.

Deputeti i Lidhjes Demokratike të Kosovës, Lutfi Haziri, vlerësoi se reagimi i BE-së nuk ishte i papritur, për shkak të zotimeve të Kosovës për krijimin e Dhomave të Specializuara. Ai kërkoi koordinim më të mirë mes udhëheqësve dhe institucioneve, që kjo çështje të mos dëmtojë procesin e integrimit evropian dhe euroatlantik.

“Reagimet e tjera që vijnë nga BE-ja janë të pritshme sepse Kosova ka pranuar në vitin 2015 ta ndajë sovranitetin për themelimin e tribunalit të saj, që quhet Dhomat e Specializuara, dhe tash duhet një koordinim tjetër, një nivel tjetër. Presidentja e re në detyrë, kryeministri në veçanti, si përfaqësues i forcës kryesore politike, edhe kryetari i Kuvendit, diplomacia parlamentare përmes politikës së jashtme, duhet të kenë një koordinim të mirë… Nuk guxojnë ta cenojnë rrugën e njëdrejtimshme për integrime euroatlantike. Jemi në prag të vlerësimeve të mëdha sa i përket NATO-s dhe rolit të Forcës së Sigurisë. Plani i rrugës dhe mekanizmat që janë ndërtuar më herët janë zhvilluar në përputhje me normat, ndërsa në integrimet evropiane kemi mbetur në shkallën e aplikimit për statusin e kandidatit”, tha Haziri.

Komisionerja e BE-së për Zgjerim, Marta Kos, më 12 tetor 2026 e quajti të papranueshëm ndryshimin e Ligjit për Dhomat e Specializuara të Kosovës. Sipas saj, ndryshimet bien ndesh me detyrimet themelore të Kosovës ndaj BE-së, ndërsa ndryshimi i rregullave gjatë proceseve gjyqësore nuk përputhet me standardet ndërkombëtare të sundimit të ligjit.

Më 15 tetor, gjatë një takimi me kryenegociatorin e Kosovës për BE-në, Jeton Zulfaj, Kos tha se ndryshimi i ligjit për Specialen përbën një hap serioz prapa për rrugën evropiane të Kosovës.

Kosova e miratoi Ligjin e ri për Gjykatën Speciale më 6 tetor, pas dënimit të ish-krerëve të UÇK-së nga kjo gjykatë, më 16 shtator.