Sela pas dënimit të ish-krerëve të UÇK-së: Ata mbrojtën jetën dhe i dhanë asaj kuptimin më të lartë, lirinë

Kryetari i Lidhjes Shqiptare, Ziadin Sela, reagoi pas vendimit të Gjykatës Speciale për dënimin me burg të ish-krerëve të UÇK-së.

Përmes një postimi në Facebook, Sela u shpreh se ish-krerët e UÇK-së e mbrojtën jetën dhe e ngritën atë në vlerën më sublime, atë të lirisë.

Sipas tij, ata kontribuuan në ndërtimin e shtetit që do të garantonte lirinë dhe të drejtën për të jetuar. Sela theksoi se sakrifica e tyre lidhet me jetën, lirinë dhe Kosovën si shtet i lirë. Ai shtoi se, në një moment kur drejtësia ka dështuar, ashtu si në raste të shumta të së kaluarës së hidhur të popullit shqiptar, mllefi i drejtë duhet të shndërrohet në gjykim, pavarësisht pafuqisë së një populli të vogël në numër dhe guximit, dinjitetit, njerëzisë e qëndresës së tij të jashtëzakonshme.

Sela nënvizoi gjithashtu se sakrifica e tyre përfaqësonte jetën, lirinë dhe Kosovën si shtet sovran e të pavarur. Ai bëri thirrje që kjo sakrificë të respektohet me qetësi dhe durim, pasi, siç shkroi, fjala e fundit ende nuk është thënë.