Reformat e vonuara nga kriza politike i rrezikojnë Kosovës mbi 100 milionë euro

Kosovës i mbeten më pak se tre muaj për të realizuar reformat e domosdoshme për Planin e Rritjes së Bashkimit Evropian, përndryshe mund të humbasë mbi 100 milionë euro. Me zgjedhjen e presidentes së re dhe vënien në funksion të të gjitha institucioneve, Kuvendit dhe Qeverisë po u kërkohet ta përqendrojnë punën në përmbushjen e këtyre detyrimeve.

Këtë javë, deputetët e Kosovës miratuan disa ligje që përbëjnë parakusht për sigurimin e fondeve të BE-së. Megjithatë, njohësit e fushës mbeten skeptikë për mundësinë e përfitimit të këtyre mjeteve, duke e lidhur vonesën e reformave me krizën politike dhe mungesën e institucioneve.

Besar Gërgi, nga Grupi për Studime Politike dhe Juridike, shpjegoi se agjenda përfshin 27 hapa reformues, me një vlerë të përgjithshme prej rreth 166 milionë eurosh. Sipas tij, disa reforma janë përmbushur, por krizat politike kanë penguar miratimin e shumë ligjeve, duke i shkaktuar Kosovës humbje financiare nga agjenda e reformave.

Njohësi i politikës Ardian Zeqiri tha se paketa ligjore ende nuk është përfunduar dhe se procedurat përkatëse kërkojnë kohë, ndërsa Kosova ka mbetur prapa. Ai paralajmëroi se mjetet rrezikojnë të humbasin nëse nuk rinegociohet afati i dhjetorit.

Për zbatimin e agjendës së reformave, njohësit e fushës kërkojnë angazhim intensiv nga institucionet dhe përcaktim të prioriteteve të punës.