Qorrolli: Opozita s’duhet të kushtëzojë ngritjen e institucioneve të reja

Deputeti i zgjedhur i Lëvizjes Vetëvendosje, Vigan Qorrolli, ka folur për zhvillimet e fundit politike në Kosovë, duke kërkuar që opozita të sillet në mënyrë konstruktive në procesin e krijimit të institucioneve të reja.

Sipas tij, pas rezultatit përfundimtar të zgjedhjeve të 7 qershorit, nuk është e drejtë që opozita të dalë me kushte.

“Nëse opozita vendos kushte është e pandershme. Aleanca ka vendosur kushte, LDK gjithashtu përmes Vjosa Osmanit. Me 7 mandate shembull Aleanca nuk mund të vendos kushte për formim të institucioneve. Shpresoj se kësaj radhe do të reflektojnë”, ka deklaruar të enjten Vigan Qorrolli.

Ai ka kujtuar se edhe në legjislaturën e kaluar, kur vendi shkoi në zgjedhje për shkak se nuk u arrit pajtim për zgjedhjen e presidentit, VV-ja ishte treguar e gatshme për bashkëpunim.

“Ne i kemi dhënë LDK-së edhe herën e kaluar hise duke u ofruar zëvendëskryeministër e ministra, por refuzuan. Në legjislaturën e kaluar ne kemi qenë në gjendje që deri në ora 23:55 t’i formojmë institucionet, por që opozita refuzoi. Ne i kemi ofruar opozitës ofertën ‘zgjidh e merr’ duke u treguar tejet kreativ. LDK tashmë i ka bërë 3-4 adresa. Shpresoj se deri në çertifikimin e rezultate të jenë unik në mënyrë që të kemi një qëndrim të tyre në lidhje me qeverinë dhe presidentin. Kosova nuk ka arsye që të humbas më shumë kohë pasi që kemi nevojë për institucione”, ka theksuar ai.

Qorrolli është shprehur gjithashtu se kampi opozitar, edhe pas mbylljes së zgjedhjeve, vazhdon të mos ketë një qëndrim të përbashkët.

“Taborit të opozitës duket se po i’u duhet kohë për reflektim pasi që nuk janë unik”, ka pohuar ndër të tjera Vigal Qorrolli.