Qirezi kërkon hetim më të thelluar të rezultateve në PISA dhe faktorëve që ndikojnë te nxënësit

Ekspertja e arsimit, Bardha Qirezi, vlerëson se rezultatet e Kosovës në testin PISA kërkojnë një shqyrtim më të detajuar, sidomos për mungesat e nxënësve, përdorimin e teknologjisë dhe nivelin e mësimdhënies.

Gjatë një interviste në emisionin “Pasdite” në RTK, ajo deklaroi se vetëm 20 për qind e 15-vjeçarëve në Kosovë e kanë ndjekur shkollën rregullisht, pa vonesa dhe mungesa.

Qirezi nënvizoi se numri i mungesave në shkolla ka qenë alarmues edhe këtë vit, ndërsa, sipas saj, kjo çështje nuk është trajtuar sa duhet.

Ajo theksoi se mungesat lidhen drejtpërdrejt me vijimin e rregullt të mësimit dhe kërkoi që të dhënat të raportohen në mënyrë më të saktë, duke u analizuar edhe shkaqet që i shtyjnë nxënësit të mos ndjekin mësimin.

Sipas ekspertes, është e nevojshme të rishikohet mënyra e evidentimit të mungesave dhe të forcohet përcjellja e vazhdueshme e vijimit në shkollë.

Duke u ndalur te përdorimi i mjeteve digjitale, Qirezi tha se ndikimi i tyre nuk është domosdoshmërisht gjithmonë pozitiv.

Ajo shpjegoi se në Kosovë teknologjia ka ndihmuar në disa raste në përmirësimin e rezultateve dhe rritjen e kompetencës në shkencë. Sipas saj, përdorimi më i kufizuar, por më i thelluar, ka ndikuar në rritjen e rezultateve të fëmijëve, ndërsa përdorimi i shpeshtë mund t’i ketë ulur ato.

Qirezi vuri në pah edhe nevojën për investime te mësimdhënësit, si dhe për hartimin e politikave arsimore mbi bazën e rezultateve të matshme.

“Gjithkund është dëshmuar që nëse investon në mësimdhënës, ti ke investuar në sistemin arsimor”, u shpreh ajo.

Një tjetër çështje që, sipas saj, duhet të marrë vëmendje është dallimi mes notave të nxënësve dhe rezultateve të tyre në testet e arritshmërisë ose në testet e maturës.