Arsimi të shpallet urgjencë kombëtare në Kosovë pas rezultateve të PISA-s

Pas publikimit të rezultateve të PISA 2025, Rrjeti i Organizatave të Shoqërisë Civile për Arsimin Parauniversitar kërkoi që arsimi të marrë statusin e urgjencës kombëtare. Sipas ROSCAP-it, të dhënat e këtij vlerësimi duhet të pasohen nga masa konkrete dhe të matshme.

Kërkesa u paraqit gjatë një tryeze të mbajtur në Prishtinë, ku morën pjesë përfaqësues të institucioneve, komunave, shkollave, sindikatës, prindërve dhe shoqërisë civile.

Ministri i Arsimit, Hajrulla Çeku, tha se vëmendja duhet të përqendrohet te zgjidhjet dhe jo te përcaktimi i përgjegjësit për problemet e arsimit.

“Për një kohë të gjatë jemi përqendruar te pyetja se kush e ka fajin. Tani duhet të pyesim: Çka bëjmë tash?”, deklaroi Çeku, sipas një njoftimi të ROSCAP-it, transmeton KosovaPress.

Çeku kërkoi që të shqyrtohet mënyra se si përdoret buxheti për arsimin dhe theksoi nevojën për ta mbrojtur punësimin në shkolla nga ndikimet partiake.

Ai njoftoi gjithashtu për vendosjen e një provimi shtetëror për hyrjen në profesionin e mësimdhënësit dhe kërkoi forcimin e rolit të këtij profesioni.

Sipas ministrit, mangësitë e sistemit arsimor bëhen më të dukshme në klasë. Ai vlerësoi se kurrikula është e mbingarkuar dhe se nxënësit ende mbështeten kryesisht te mësimi përmendësh.

Ministri paralajmëroi një kalim gradual drejt mësimit tërë ditor, si dhe ndryshime për përmirësimin e kurrikulës. Ai bëri thirrje për një marrëveshje shoqërore për arsimin, e cila do të jetë mbi partitë politike dhe mandatet qeverisëse.

Pjesëmarrësit thanë se rezultatet e PISA-s nuk duhet të shihen si objektiv në vetvete, por si një pasqyrë e gjendjes dhe problemeve të sistemit. Ndër kërkesat e tyre ishin rishikimi i kurrikulës, përmirësimi i procesit të vlerësimit dhe zhvillimi i shkathtësive të leximit.

Gjatë tryezës u kërkua edhe avancimi i zhvillimit profesional të mësimdhënësve, rritja e vijueshmërisë dhe përmirësimi i infrastrukturës në shkolla.

ROSCAP u bëri thirrje institucioneve që të marrin parasysh edhe kërkesat e dymbëdhjetë mijë e pesëqind e njëzet e gjashtë qytetarëve, të cilët kishin nënshkruar Peticionin për Shpëtimin e Arsimit, të dorëzuar në Kuvend në mars 2024.

Si përfundim i diskutimeve do të përgatitet një dokument me rekomandime dhe përfundime për institucionet qendrore, komunat dhe shkollat. Sipas njoftimit, ky dokument pritet të publikohet së shpejti.