Prokurori Kodraliu: BIA synonte goditjen e figurave politike në Kosovë para zgjedhjeve

Prokuroria Speciale e Kosovës po heton shtatë raste spiunazhi që përfshijnë disa persona të dyshuar se janë rekrutuar nga Agjencia e Inteligjencës së Serbisë, BIA. Prokurori Bekim Kodraliu, në një intervistë ekskluzive për RTK-në, bëri të ditur se deri tani janë shqiptuar katër aktgjykime dënuese.

Gjatë dy viteve të fundit, sipas Kodraliut, Prokuroria Speciale ka zhvilluar veprime hetimore për këtë dukuri në bashkëpunim me Agjencinë Kosovare për Inteligjencë dhe Policinë e Kosovës.

Nga katër vendimet dënuese për veprën penale të spiunazhit, dy kanë marrë formë të prerë. Ato u përkasin Aleksandër Vlajiqit dhe Bojan Jevtiqit, të cilët e kanë pranuar fajësinë për akuzat e mbështetura nga Prokuroria me prova konkrete.

Ndjeshmëria e këtyre rasteve, siç shpjegoi Kodraliu, lidhet edhe me detyrat e larta që dy të dënuarit kishin ushtruar në Policinë e Kosovës.

Njëri prej tyre kishte gradën e togerit dhe shërbente në pikën kufitare në Kamenicë, ndërsa tjetri kishte punuar si zyrtar i inteligjencës policore në pjesën veriore të Mitrovicës. Pikërisht për shkak të këtyre pozitave, Prokuroria kishte vepruar me urgjencë për sigurimin e provave.

Aleksandër Vlajiq është dënuar gjithashtu për sulmin terrorist ndaj zyrave të KKZ-së në Mitrovicë, të kryer në dhjetor të vitit 2022.

Hetimi për spiunazh ndaj tij nisi pasi gjatë ekzaminimit të telefonave u zbuluan dëshmi të mjaftueshme. Provat e tjera të mbledhura më pas vërtetuan edhe para gjykatës se Vlajiq ishte rekrutuar nga shërbimi inteligjent serb, konkretisht nga zyrtari, përkatësisht personi përgjegjës i BIA-s për rajonin e Novipazarit.

Nga i njëjti hetim u hap një rast penal edhe kundër një zyrtareje nga Mitrovica e Veriut, e cila kishte qenë pjesë e misionit të OSBE-së në Kosovë.

Ajo është shpallur fajtore në shkallën e parë, ndërsa rasti aktualisht po shqyrtohet në Apel. Për këtë arsye, Kodraliu tha se duhet të jetë i rezervuar në deklarimet për zyrtaren, pasi procedura gjyqësore ndaj saj vazhdon.

Duke iu referuar rastit të Fatmir Shehollit, prokurori deklaroi se ai kishte ndihmuar shërbimin inteligjent serb, më saktësisht Bojan Dimiqin, zyrtar i lartë i BIA-s për kundërterrorizëm.

Sipas Kodraliut, ndihma e Shehollit lidhej me zbatimin e një misioni që synonte dëmtimin e disa figurave politike në Kosovë. Ai theksoi se goditja ndaj tyre ishte planifikuar të ndodhte përpara zgjedhjeve të mbajtura në Kosovë.