Përfundon Kursi i Avancuar për Snajperët, FSK forcon aftësitë operacionale

Forca e Sigurisë së Kosovës ka përmbyllur Kursin e Avancuar për Snajper, pjesë e përpjekjeve për zhvillimin dhe avancimin e kapaciteteve profesionale të pjesëtarëve të saj.

FSK ka bërë të ditur se trajnimi synoi përgatitjen e pjesëmarrësve për kryerjen e detyrave të vëzhgimit, zbulimit dhe grumbullimit të informacioneve në zona me rrezikshmëri të lartë.

Programi përfshiu planifikimin dhe organizimin e misioneve, kalkulimin dhe realizimin e qitjeve, përdorimin e sistemeve të precizionit SIG Sauer, si dhe zhvillimin e aftësive fushore, përfshirë kamuflimin, fshehjen dhe lëvizjen. Pjesëmarrësit u trajnuan dhe iu nënshtruan vlerësimit në këto fusha profesionale.

“Përmes trajnimeve të avancuara, FSK vazhdon të investojë në rritjen e profesionalizmit, disiplinës dhe kapaciteteve operacionale të pjesëtarëve të saj, në funksion të përmbushjes së misionit dhe standardeve të kërkuara profesionale”, thuhet në njoftimin e FSK-së.