Pas 27 vitesh pritjeje, identifikohet Salih Mëziu nga familja e të zhdukurve të “Grupit të Intelektualëve

Familja Mëziu nga Marina e Skenderajt ka njoftuar se, pas më shumë se 27 vitesh, është identifikuar njëri prej 10 anëtarëve të saj të zhdukur në kuadër të “Grupit të Intelektualëve”.

Sipas njoftimit të familjarëve, personi i identifikuar është babai i familjes, Salih Mëziu.

Lajmi ka sjellë njëkohësisht dhimbje dhe lehtësim për të afërmit, të cilët pas një pritjeje të gjatë kanë marrë më në fund një përgjigje për fatin e tij.

Familja ka bërë të ditur se kjo përgjigje, ndonëse e shumëpritur, mbetet e rëndë dhe e dhimbshme. Për më shumë se 27 vjet, ata kanë jetuar mes ankthit, shpresës dhe pasigurisë, pa e ditur se ku ndodhej i afërmi i tyre.

“Sot, edhe pse kemi marrë një përgjigje, zemrat tona mbeten të thyera”, thuhet në njoftimin e familjes Mëziu.

Familjarët vazhdojnë të presin identifikimin e anëtarëve të tjerë të familjes, me shpresën se pas kaq shumë vitesh do të mund të zhvillojnë ceremoninë e varrimit dhe t’u japin lamtumirën e fundit, me nderimin që meritojnë.

Familja ka deklaruar se është në koordinim me institucionet kompetente dhe se lutet për marrjen sa më shpejt të informacionit edhe për pjesëtarët e tjerë të saj.

“Të pikëlluar, familja Mëziu”, përfundon njoftimi.