Haxhiu: Pas 27 vitesh, familjet e tre intelektualëve të zhdukur mësuan të vërtetën

Ushtruesja e detyrës së presidentes, Albulena Haxhiu, mori pjesë në ceremoninë përkujtimore të zhvilluar në Qendrën e Kulturës “Rexhep Mitrovica” në Mitrovicë, ku u nderuan Adem Beqiri, Idriz Rrecaj dhe Salih Mëziu, pjesë e grupit të njohur si “Grupi i Intelektualëve”.

Haxhiu deklaroi se, pas 27 vitesh kërkimesh, familjet e tre viktimave kanë marrë më në fund përgjigje për fatin e të afërmve të tyre, të cilët tani mund të prehen në paqe.

Sipas saj, më 19 prill 1999, forcat serbe rrëmbyen 23 civilë shqiptarë nga Skenderaj dhe Mitrovica. Të ndaluarit u morën në Melajë dhe në Kalludër të Vogël, ku u keqtrajtuan dhe u ekzekutuan, ndërsa trupat e tyre u fshehën me qëllim zhdukjen e gjurmëve të krimit.

Gërmimet e kryera në Kalludër dhe Jabukë, së bashku me rezultatet e analizave të ADN-së, bënë të mundur identifikimin e Idriz Rrecajt, Adem Beqirit dhe Salih Mëziut. Ata u gjetën në varre pa emër, por tashmë do të prehen me identitetin e tyre dhe familjet do të kenë një vend ku mund t’i përkujtojnë e nderojnë.

Haxhiu shprehu mirënjohje për të gjithë personat që kontribuuan në gjetjen dhe identifikimin e tyre, duke theksuar se procesi i kërkimit duhet të vijojë për 20 anëtarët e tjerë të grupit, si dhe për çdo person të zhdukur me dhunë.

Ajo nënvizoi se familjet kanë të drejtë ta dinë të vërtetën dhe se krimet e luftës duhet të ndëshkohen. Në fund, familjeve Beqiri, Rrecaj dhe Mëziu u përcolli ngushëllimet e saj më të sinqerta.

“I përjetshëm qoftë kujtimi i Adem Beqirit, Idriz Rrecajt dhe Salih Mëziut, si dhe i të gjithë të rënëve dhe të vrarëve për lirinë e Kosovës!”, u shpreh Haxhiu.