Osmani: Bekim Sejdiu është nder për Kosovën, LDK-ja nuk ndikohet nga “kurthet” politike

Ish-presidentja e Kosovës, Vjosa Osmani, ka vlerësuar kandidaturën e profesor doktor Bekim Sejdiut për postin e presidentit të Republikës së Kosovës, duke deklaruar se ai përmbush kriteret e miratuara nga grupi parlamentar i Lidhjes Demokratike të Kosovës.

Sipas Osmanit, propozimi për Sejdiun përputhet edhe me vendimin e Këshillit të LDK-së, i cili ka kërkuar që partia të angazhohet për krijimin e institucioneve të Kosovës.

“Kandidatura e zotëri Sejdiut është një nder për të gjithë Republikën e Kosovës. Ai plotëson kriteret për të cilat kemi rënë dakord unanimisht në mbledhjen e fundit të grupit parlamentar dhe respekton vendimin e Këshillit të Lidhjes Demokratike të Kosovës, që i ka kërkuar kryetarit të LDK-së të bëjë gjithçka për t’i dhënë Kosovës institucione”, u shpreh Osmani.

Ajo shtoi se zgjedhja e Sejdiut do t’i mundësonte vendit të vazhdonte punën për mbrojtjen e demokracisë, Kushtetutës dhe forcimin e aleancave.

Osmani nënvizoi gjithashtu përvojën profesionale të Sejdiut, të cilën e cilësoi si të jashtëzakonshme dhe gjithmonë të orientuar drejt interesit të Republikës së Kosovës.

“Përvoja e profesor doktor Bekim Sejdiut në këto fusha ka qenë e jashtëzakonshme dhe në çdo rast ka qenë në shërbim të interesit të Republikës së Kosovës. Si Lidhje Demokratike e Kosovës kemi bërë një kompromis, duke vendosur interesin e Kosovës mbi çdo interes individual apo partiak”, deklaroi ajo.

Sipas ish-presidentes, përgjegjësia për krijimin e institucioneve të qëndrueshme nuk i takon vetëm LDK-së, por të gjithë deputetëve të Kuvendit të Kosovës.

“Çdo deputet i Kuvendit të Kosovës ka një përgjegjësi historike për t’i dhënë vendit institucione stabile. Kosova ka nevojë për një presidencë që do të vijojë mbrojtjen e aleancave, përfshirë partneritetin strategjik me Shtetet e Bashkuara të Amerikës, si dhe mbrojtjen e Kushtetutës dhe parimeve demokratike”, tha Osmani.

Ajo shprehu bindjen se Bekim Sejdiu është i aftë t’i përmbushë këto detyrime dhe se zgjedhja e tij do t’i bënte nder Kosovës.

Osmani tha se LDK-ja e ka propozuar Sejdiun si një kontribut për vendin dhe se ky vendim vendos interesin shtetëror mbi çdo konsideratë tjetër.

Lidhur me mundësinë që Sejdiu të sigurojë mbështetjen e nevojshme në Kuvend, Osmani deklaroi se dëshiron të mbetet optimiste, pasi sipas saj nuk ekziston arsye për refuzimin e kandidaturës. Ajo bëri të ditur se grupi parlamentar i LDK-së do të zhvillonte një takim për këtë çështje.

E pyetur nëse kishte diskutuar me Sejdiun për shkeljet kushtetuese që, sipas saj, janë kryer nga qeveria, Osmani tha se ai do të mund t’u përgjigjej vetë këtyre çështjeve nëse zgjidhet president.

“Kur të zgjidhet presidenti i ardhshëm i Republikës së Kosovës, jam e bindur se do t’u përgjigjet me kënaqësi këtyre pyetjeve. Unë i kam shprehur qëndrimet e mia për tema të ndryshme. Për disa çështje jam pajtuar në atë periudhë, ndërsa për të tjera nuk jam pajtuar aspak, dhe këtë ju e dini”, tha ajo.

Osmani sqaroi se gjatë mandatit të saj Sejdiu ka shërbyer si ekspert i jashtëm i presidencës dhe ka dhënë këshilla për një gamë të gjerë çështjesh.

Ajo përmendi kontributin e tij në raportet me Shtetet e Bashkuara të Amerikës, në proceset e integrimit euroatlantik, në përballjen me Serbinë dhe në çështjet kushtetuese me të cilat ishte përballur presidenca.

“Profesor Sejdiu ka qenë ekspert i jashtëm i presidencës dhe na ka këshilluar për fusha të ndryshme. Ai ka kontribuar veçanërisht në marrëdhëniet me Shtetet e Bashkuara të Amerikës, në çështjet e integrimit euroatlantik dhe në përballjen me Serbinë”, deklaroi ish-presidentja.

Sipas saj, Sejdiu e kishte ndihmuar presidencën të përgatitej për përballjet e shumta me Serbinë, si dhe për çështje të ndryshme kushtetuese gjatë mandatit.

Osmani tha se, nëse merr postin e presidentit, Sejdiu do të ketë vlerësimin dhe qëndrimin e tij për secilën çështje, duke dalë publikisht atëherë kur kjo të jetë në interes të Kosovës.

E pyetur për deklaratën e Armend Zemajt, i cili e kishte cilësuar kandidaturën e Sejdiut si “një kurth i Albin Kurtit”, Osmani e kundërshtoi këtë interpretim.

“LDK-ja nuk bie në kurthet e askujt. Ne e kemi propozuar me krenari profesor Bekim Sejdiun dhe shumica dërrmuese e anëtarëve të LDK-së e njeh prej shumë kohësh. Shumë prej deputetëve aktualë të grupit parlamentar e njohin kontributin e tij që nga vitet ’90-ta, ndërsa disa që nga viti 2007. Emri i tij nuk është kurth, por nder për Republikën e Kosovës”, tha Osmani.

Osmani shpjegoi se kandidatura duhet të kalojë fillimisht nëpër procedurat e brendshme të LDK-së, përpara se të dërgohet në Kuvend.

“Në LDK procedurat kanë qenë gjithmonë të tilla: fillimisht arrihet një marrëveshje parimore, pasi pa dakordimin e grupit parlamentar nuk mund të shkohet në Kuvendin e Kosovës. Ne jemi pajtuar për parimet dhe kriteret që duhet të plotësojë kandidati”, u shpreh ajo.

Ajo theksoi se grupi parlamentar kishte marrë vendim unanim që kandidati të ishte jopartiak dhe deklaroi se Sejdiu i plotëson këto kushte, ndërsa kontributi i tij për shtetin e Kosovës e bën të denjë për mbështetjen e LDK-së.

Osmani tha se LDK-ja nuk duhet të fokusohet te qëndrimet e partive të tjera, por te mbështetja që vetë ajo do t’i japë kandidaturës së Sejdiut, pasi kjo, sipas saj, i shërben interesit të vendit.

“Nuk kemi pse të mendojmë për partitë e tjera. Ne duhet të përqendrohemi te përkrahja që si Lidhje Demokratike e Kosovës do t’ia japim, sepse kjo është në interes të vendit. Po në interes të Kosovës është edhe shmangia e zgjedhjeve të reja, nga të cilat qytetarët nuk përfitojnë. Bllokadat dhe ngërçet e vazhdueshme kanë shkaktuar dëme të mëdha brenda vendit dhe në arenën ndërkombëtare”, përfundoi Osmani.