Bekim Sejdiu propozohet për President të Kosovës, Vjosa Osmani vlerëson kandidaturën

Pas dakordimit mes Lëvizjes Vetëvendosje (LVV) dhe Lidhjes Demokratike të Kosovës (LDK) që Prof. Dr. Bekim Sejdiu të jetë kandidat për President të Kosovës, presidentja Vjosa Osmani ka reaguar përmes një mesazhi publik.

Osmani e ka mirëpritur kandidaturën e Sejdiut, duke e përshkruar atë si një person me seriozitet, integritet dhe vizion. Ajo ka nënvizuar se bëhet fjalë për një profesionist të dëshmuar, të cilin e njeh personalisht pas 25 vitesh bashkëpunimi.

Presidentja ka veçuar përvojën dhe angazhimin e tij, ndërsa u ka bërë thirrje përfaqësuesve të zgjedhur që, gjatë vendimmarrjes për presidentin e ardhshëm, të udhëhiqen nga interesi shtetëror dhe ruajtja e stabilitetit institucional, përcjell “Bota sot”.

“Kosova tashmë ka një kandidat për Presidentin e Republikës që mishëron seriozitetin, integritetin dhe vizionin e nevojshëm për një përgjegjësi të këtij niveli.

Prof. Dr. Bekim Sejdiu.

Ai është një profesionist me përvojë, njeri me integritet dhe figurë që i njeh nga afër shtetin, institucionet dhe sfidat me të cilat përballet Kosova. Për mua, Sejdiu është edhe një bashkëpunëtor i dëshmuar, me të cilin kam bashkëpunuar për 25 vite. Kjo përfshin edhe punën në kabinetin tim gjatë periudhës kur kam ushtruar detyrën e Presidentes, ndaj e njoh nga afër përkushtimin, karakterin dhe ndjenjën e përgjegjësisë së tij.

Vendimi përfundimtar u takon përfaqësuesve të zgjedhur të Republikës, ndërsa pesha e kësaj zgjedhjeje është historike. Zgjedhja duhet të bëhet duke pasur parasysh Kosovën që synojmë të ndërtojmë, interesin shtetëror, stabilitetin institucional, forcimin e aleancës euroatlantike dhe demokracinë.

Na priftë e mbara, me Republikën mbi gjithçka!”