Në Supreme shqyrtohet kundërshtimi i Jeton Vllasaliut ndaj burgimit të përjetshëm për vrasjen e Bedri Rexhepit

Të enjten, në Gjykatën Supreme po zhvillohet seanca për shqyrtimin e kërkesës për mbrojtje të ligjshmërisë në rastin ku Jeton dhe Nexhat Vllasaliu akuzohen për vrasjen e biznesmenit Bedri Rexhepi.

Ngjarja për të cilën ata po përballen me akuzë ka ndodhur në vitin 2021, ndërsa motivi i pretenduar ishte përfitimi i dobisë pasurore, raporton “Betimi për Drejtësi”.

Gjatë paraqitjes para gjykatës, Jeton Vllasaliu deklaroi se qëndronte pas qëndrimit të avokatit të tij dhe se nuk pajtohej me aktgjykimin e shkallës së parë, përmes të cilit ishte dënuar me burgim të përjetshëm.

Gjykata Themelore në Prishtinë, me aktgjykimin e datës 28 maj 2025, i shpalli fajtorë Jeton dhe Nexhat Vllasaliun dhe i dënoi me burgim të përjetshëm për vrasjen e Bedri Rexhepit. Ky vendim u konfirmua më vonë edhe nga Gjykata e Apelit.

Sipas aktakuzës së Prokurorisë Themelore në Prishtinë, dy të akuzuarit ngarkohen për veprën penale “Vrasje e rëndë”, të përcaktuar në nenin 173, paragrafi 1.6 dhe 1.4, lidhur me nenin 31 të Kodit Penal të Republikës së Kosovës (KPRK).

Prokuroria pretendon se, nga 9 janar 2021 deri më 8 prill 2021, Jeton dhe Nexhat Vllasaliu, në bashkëkryerje dhe pas një marrëveshjeje paraprake, kishin planifikuar privimin nga jeta të dëmtuarit Bedri Rexhepi, me synim përfitimin e dobisë pasurore.

Gjithashtu, ndaj tyre është ngritur akuzë edhe për veprën penale “Dëmtim i varreve apo kufomave”, sipas nenit 413, paragrafi 2, lidhur me nenin 31 të KPRK-së.