Mushkolaj kërkon mobilizim të fuqishëm të shtetit në fazën e Apelit

Profesoresha universitare Gjyljeta Mushkolaj ka komentuar aktgjykimin e Gjykatës Speciale në Hagë, si dhe fazën e mundshme të apelimit.

Sipas saj, barra e këtij procesi nuk duhet t’i mbetet vetëm ekipit të mbrojtjes, por duhet të përfshijë edhe të gjithë mekanizmat shtetërorë.

Mushkolaj theksoi se apelimi është para së gjithash përgjegjësi e mbrojtjes, por njëkohësisht duhet të trajtohet si çështje e shtetit. Ajo kërkoi mobilizim të fuqishëm të të gjitha kapaciteteve shtetërore, me synimin që aktgjykimi të rrëzohet në Apel.

E pyetur nëse shqyrtimi nga Apeli mund të zgjasë për vite, profesoresha vlerësoi se kjo fazë e procedurës duhet të përfundojë brenda një kohe më të shkurtër.

Ajo deklaroi se, ndonëse bëhet fjalë për një gjykatë vendore, përbërja e saj është tërësisht ndërkombëtare. Sipas Mushkolajt, institucione të tilla ndërkombëtare priren ta zgjasin veprimtarinë e tyre, pasi me vazhdimin e punës vijojnë edhe pagesat dhe çështje të tjera të ndërlidhura. Megjithatë, ajo sqaroi se ky rast dallon disi, për shkak të ekzistimit të regjistrit të gjyqtarëve, të cilët paguhen vetëm për periudhën gjatë së cilës janë aktivë.

Mushkolaj tha se pret që Dhomat e Specializuara ta mbyllin shumë shpejt edhe etapën e procedurës së apelimit.

Sipas vlerësimit të saj, procesi mund të zgjasë rreth një vit, ndërsa kërkoi që të ketë edhe presion më të madh diplomatik për të mos lejuar tejkalimin e këtij afati.

Ajo nënvizoi se kohëzgjatja nuk lidhet vetëm me vetë vendimin, por edhe me pozitën në të cilën do të ndodhet i gjithë shteti deri në nxjerrjen e vendimit përfundimtar.

Mushkolaj përmendi gjithashtu Dhomën e Specializuar të Gjykatës Kushtetuese, duke thënë se ka hapësirë për veprim edhe në raport me të. Ajo rikujtoi raportin e porositur nga Avokati i Popullit dhe të hartuar nga një segment i Odës së Avokatëve Britanikë, i cili kishte mbërritur shumë vonë dhe trajtonte shkeljet e ndryshme procedurale, si dhe cenimet e të drejtave të të pandehurve gjatë tërë procesit gjyqësor.