Liria ka Emër” kërkon mbledhje urgjente të qeverive të Kosovës dhe Shqipërisë pas aktgjykimit të Hagës

Ismail Tasholli, përfaqësues i platformës “Liria ka Emër”, u ka bërë thirrje Qeverisë së Kosovës dhe Qeverisë së Shqipërisë që të zhvillojnë një takim të përbashkët urgjent.

Ai ka propozuar që mbledhja të ketë vetëm një çështje në rendin e ditës: ofrimin e mbështetjes institucionale për mbrojtjen e luftës së UÇK-së dhe garantimin e fondeve të nevojshme për mbrojtjen juridike.

Tasholli tha se deklaratat nuk janë më të mjaftueshme dhe se tani kërkohen veprime konkrete, pasi koha në dispozicion është e shkurtër. Sipas tij, nuk duhet të ketë më lojëra politike të lidhura me interesat elektorale, por bashkëpunim dhe seriozitet të plotë.

Ai rikujtoi gjithashtu deklaratën e miratuar në Shqipëri për Kosovën, si dhe kërkesën e Elisa Spiropalit për krijimin e një fondi të përbashkët për mbrojtjen.

“Për këtë arsye, kërkojmë që Qeveria e Kosovës dhe Qeveria e Shqipërisë të thërrasin sa më shpejt një mbledhje të përbashkët, me një pikë të vetme në rendin e ditës: mbështetjen institucionale për mbrojtjen e luftës së UÇK-së dhe sigurimin e financimit të nevojshëm për mbrojtjen juridike”, u shpreh Tasholli.