Limaj: Deklarata e Trendafilovës tregon ndikimin e parë të ligjit të ri për Dhomat Specializuara

Kryetari i NISMA-s, Fatmir Limaj, e ka vlerësuar si zhvillim pozitiv deklaratën e kryetares së Dhomave të Specializuara të Kosovës në Hagë, Ekaterina Trendafilova, pas miratimit të ligjit të ri nga Kuvendi i Kosovës.

Gjatë një interviste në emisionin “FIVE” në Dukagjin, Limaj deklaroi se reagimi i saj lidhet me veprimet konkrete të ndërmarra nga Kosova. Sipas tij, fakti që Trendafilova doli publikisht për të dhënë sqarime përbën shenjën e parë se ligji ka nisur të japë efekt.

Ai tha se kryetarja e Dhomave të Specializuara nuk e ka komentuar drejtpërdrejt përmbajtjen e ligjit të ri, por është ndalur te baza ligjore mbi të cilën vepron ky institucion.

Limaj theksoi se Trendafilova nuk ka kompetencë të komentojë ose të interpretojë ligjet e miratuara nga Kuvendi i Kosovës. Ai vlerësoi se në deklaratën e saj ajo është treguar e kujdesshme, pikërisht për shkak të këtyre kufizimeve.

“Së pari besoj që ky reagim vjen si pasojë e veprimeve konkrete të Kosovës, Ligjit, nuk duhet të kishin një reagim të tillë siç s’kanë pasur tash e gjashtë vite, efektet e para dhe shenjat e para të efektit të ligjit është detyrimi i zonjës Trandafilova për të dalë me dhënë këtë sqarim e prononcim dhe kjo është shenja e parë e efektit të ligjit”, u shpreh Limaj.

Ai shtoi se Trendafilova nuk ka komentuar ligjin e miratuar, por ka shpjeguar bazën ligjore mbi të cilën funksionojnë Dhomat e Specializuara. Sipas Limajt, ajo e di se nuk ka të drejtë të interpretojë ligjet e Kosovës dhe aktet e nxjerra nga Kuvendi.

“Për mua është një hap pozitiv vetë detyrimi i saj me dalë me i dhanë disa sqarime pavarësisht çka tha tregon efektet e para të ligjit sepse këta tash e sa vite i ka shoqëruar arroganca, moskomunikimi e mos transparenca siç e dini edhe ju – këta e kanë parë të nevojshme me fol nëpër zyre e jo me ju drejtua qytetarëve të Kosovës në emër të të cilëve gjykojnë e punojnë”, deklaroi kreu i NISMA-s.