LDK-ja në Rahovec kërkon proces zgjedhor të brendshëm në të gjitha nivelet

Përmes një komunikate të publikuar në Facebook, Dega e Lidhjes Demokratike të Kosovës (LDK) në Rahovec ka kërkuar që partia të kalojë në një proces të përgjithshëm zgjedhor në çdo nivel organizativ, duke nisur nga nëndegët dhe deri te kryetari i partisë.

Në njoftimin e Degës së Lidhjes Demokratike të Kosovës (LDK) në Rahovec thuhet se në mbledhjen e mbajtur më 26.06.2026, mes çështjeve të shqyrtuara ishte edhe analiza e rezultatit të zgjedhjeve të 7 qershorit 2026, si në Komunën e Rahovecit, ashtu edhe në nivel të Republikës së Kosovës.

Dega e Lidhjes Demokratike të Kosovës (LDK) në Rahovec njofton se Kryesia e Degës, me unanimitet të anëtarëve të pranishëm, ka vendosur që, duke marrë përgjegjësi për këtë rezultat zgjedhor, Lidhja Demokratike e Kosovës duhet të hyjë në një proces të përgjithshëm zgjedhor, nga nëndegët deri te Kryetari i LDK-së.

Sipas njoftimit, në zgjedhjet e 7 qershorit 2026 pritjet e Degës dhe të aktivistëve kanë qenë për një rezultat më të mirë të LDK-së. Duke pasur parasysh rezultatin e dobët zgjedhor në përgjithësi, e në veçanti në Rahovec, Dega e LDK-së në Rahovec e konsideron të domosdoshme organizimin e zgjedhjeve në të gjitha nivelet. Në të njëjtin njoftim theksohet se vetëm përmes një procesi të tillë gjithëpërfshirës, statutar dhe transparent do të garantohej një LDK e fortë.