Kush do t’i thërrasë zgjedhjet nëse dështon zgjedhja e presidentit? Ja çfarë thotë Kadri Kryeziu

Ushtruesja e detyrës së presidentes së Kosovës, Albulena Haxhiu, i është drejtuar Gjykatës Kushtetuese për të marrë një interpretim mbi ushtrimin e kompetencave presidenciale pas përfundimit të mandatit të saj gjashtëmujor, nëse Kuvendi nuk zgjedh presidentin e ri.

Kërkesa është paraqitur më 5 tetor dhe është konfirmuar nga Zyra e Presidentes më 6 tetor, datë kjo që shënon edhe përfundimin e afatit për zgjedhjen e presidentit të ri.

Sipas Zyrës së Presidentes, Gjykata Kushtetuese duhet të sqarojë mënyrën dhe autoritetin që do t’i ushtrojë kompetencat e domosdoshme presidenciale në rast se mandati gjashtëmujor i ushtrueses së detyrës përfundon pa u zgjedhur pasuesi i saj.

Në këtë situatë mbetet pezull edhe çështja se kush do t’i shpallë zgjedhjet, nëse mandati i ushtrueses së detyrës së presidentes përfundon pa zgjedhjen e një presidenti të ri.

Kadri Kryeziu, ish-anëtar i Gjykatës Kushtetuese, ka thënë se kjo çështje tashmë është dërguar për shqyrtim në këtë institucion, i cili duhet të japë sqarimin përkatës.

“Është bërë pyetja në Gjykatën Kushtetuese, ajo ka për detyrë të sqarojë situatën, përndryshe ka zbrazëtira juridiko-kushtetuese për këtë rast të paprecedent në Republikën e Kosovës”, tha ai për “Bota sot”.

Rëndësia e kësaj çështjeje lidhet edhe me pasojat kushtetuese që mund të shkaktohen nëse Kuvendi dështon ta zgjedhë presidentin. Në një rast të tillë, Kuvendi shpërndahet dhe vendi shkon në zgjedhje të parakohshme.