Kurti njofton se Kosova do të marrë 206.4 milionë euro nga fondet e Bashkimit Evropian

Kryeministri në detyrë, Albin Kurti, ka bërë të ditur një zhvillim pozitiv për vendin, duke njoftuar se Kosova do të përfitojë 206.4 milionë euro nga fondet e Bashkimit Evropian.

Ai sqaroi se Komiteti i IPA-s ka dhënë miratimin për projektet që Kosova ka propozuar në kuadër të programeve IPA 2026 dhe IPA 2027, me një vlerë prej 180.5 milionë euro. Po ashtu, janë aprovuar edhe 3 grante nga Korniza Investuese për Ballkanin Perëndimor (ËBIF), në shumën totale prej 25.9 milionë euro.

Në postimin e tij të plotë, Kurti u shpreh: “Lajm i mirë për qytetarët. Kosova përfiton 206.4 milionë euro nga fondet e BE-së.”

Ai bëri të ditur se dje, me 7 korrik, Bashkimi Evropian e ka njoftuar zyrtarisht Kosovën se Komiteti i IPA-s ka miratuar projektet e propozuara nga vendi në kuadër të IPA 2026 dhe IPA 2027, në vlerë prej 180.5 milionë euro. Sipas tij, pas miratimit nga Komisioni Evropian dhe më pas nënshkrimit dhe ratifikimit të Marrëveshjes Financiare nga Kuvendi, do të nisë zbatimi i projekteve.

Sipas Kurtit, këto fonde do të mbështesin sektorët prioritarë të vendit.

• Mjedisi dhe klima – 44 milionë euro;

• Energjia – 34.5 milionë euro;

• Menaxhimi i kufijve dhe migrimi – 30.5 milionë euro;

• Konkurrueshmëria, arsimi dhe punësimi – 31.8 milionë euro;

• Qeverisja e mirë dhe përafrimi me BE – 24.7 milionë euro;

• Sundimi i ligjit – 15 milionë euro.

Ai theksoi gjithashtu se afërsisht gjysma e këtyre fondeve do të orientohet drejt investimeve infrastrukturore. Ndërkaq, shumica e projekteve do të zbatohen në bashkëpunim me partnerë të tjerë zhvillimorë dhe me bashkëfinancim nga institucionet e Kosovës.

Përveç projekteve të IPA 2026 dhe IPA 2027, Kurti njoftoi edhe miratimin e 3 granteve nga Korniza Investuese për Ballkanin Perëndimor (ËBIF), në vlerë të përgjithshme prej 25.9 milionë euro.

Grantet përfshijnë Hidrosistemin Ibër-Lepenc, për asistencë teknike në përgatitjen e investimit infrastrukturor; Autostradën Qafë e Duhlës–Banullë, për asistencë teknike në përgatitjen e segmentit të autostradës; si dhe impiantin e trajtimit të ujërave të zeza në Podujevë, me grant investues prej 24.3 milionë euro, në bashkëpunim me BERZH.

Në fund, ai falënderoi Bashkimin Evropian për mbështetjen, duke theksuar se këto mjete do të përdoren në shërbim të qytetarëve dhe për zhvillimin e vendit.