Kurti inspekton urën e re në Mitrovicë: Përfundimi parashikohet brenda vitit

Kryeministri në detyrë i Kosovës, Albin Kurti, ka parë nga afër ecurinë e ndërtimit të urës së re mbi lumin Ibër në Mitrovicë, e cila do të krijojë lidhjen mes Zhabarit dhe Gushacit.

Ai njoftoi se zbatimi i projektit po vazhdon në përputhje me planin dinamik. Nëse ruhet ritmi aktual, ura pritet të jetë gati brenda këtij viti.

Sipas Kurtit, kjo vepër e rëndësishme infrastrukturore do të mundësojë ndërlidhje më të mirë për qytetarët, do të shtojë nivelin e sigurisë dhe do t’u sigurojë organeve të rendit qasje më të shpejtë e më të lehtë në të dyja brigjet e lumit. Investimi synon gjithashtu të krijojë kushte më të favorshme për zhvillimin ekonomik të zonës.

Projekti parashikon që ura të jetë 65 metra e gjatë dhe 22.5 metra e gjerë. Ajo do të ketë katër korsi për qarkullimin e automjeteve, secila me gjerësi 3.5 metra, si dhe trotuare prej 2.2 metrash në të dyja anët.

Pjesë e punimeve janë edhe dy rrethrrotullime dhe një segment rrugor me gjatësi 500 metra. Po ashtu, është planifikuar rehabilitimi i shtratit të lumit Ibër në një hapësirë 525 metra të gjatë dhe 47 metra të gjerë, me synimin për të mbrojtur mjedisin, për të rritur sigurinë dhe për të ruajtur infrastrukturën përreth.