Kurti në Mitrovicë: Të rinjtë ta kërkojnë të vërtetën dhe ta thonë pa frikë

Kryeministri i Kosovës, Albin Kurti, njoftoi se në Mitrovicë ka nisur Samiti Ndërkombëtar Ballkanik i Rinisë për Paqe 2026, i organizuar nga Youth and Students for Peace Balkan dhe Federata Universale e Paqes. Në këtë aktivitet marrin pjesë të rinj dhe të reja nga mbi 50 shtete.

Ai bëri të ditur se hapja e samitit u zhvillua në të njëjtën ditë me 29-vjetorin e protestës studentore të 1 Tetorit 1997, duke vënë në dukje rrugëtimin e Kosovës gjatë tri dekadave të fundit.

Sipas Kurtit, shteti i Kosovës është ngritur mbi vlerat e lirisë dhe barazisë për të gjithë qytetarët, pa dallim të përkatësisë së tyre.

Gjatë fjalimit, kryeministri theksoi se demokracitë sot po përballen me sfida të reja, veçanërisht me dezinformimin, i cili e vështirëson dallimin mes së vërtetës dhe gënjeshtrës. Për këtë arsye, ai u kërkoi të rinjve të mos heqin dorë nga kërkimi i së vërtetës dhe të kenë kurajë ta shprehin atë publikisht.

Kurti foli edhe për zhvillimin e inteligjencës artificiale, duke vlerësuar se ajo do të sjellë përfitime të rëndësishme, por nuk mund të zëvendësojë keqkuptimet, faljet dhe përpjekjet njerëzore për mirëkuptim. Sipas tij, pikërisht këto elemente ndërtojnë marrëdhënie të vërteta dhe hapin rrugën drejt paqes.

Ai kujtoi gjithashtu rolin e urave mbi Ibër në Mitrovicë, të cilat për shumë vite, ndonëse dukeshin si ura, në praktikë funksiononin si mure. Sot, siç u shpreh Kurti, ato shërbejnë për të afruar dhe lidhur njerëzit.

Kurti tha se, nga protestat e vitit 1997 e deri më sot, Kosova ka kaluar nëpër etapa të rëndësishme, nga çlirimi te pavarësia dhe më pas te ndërtimi i një demokracie funksionale, e shoqëruar me rritje të qëndrueshme ekonomike.

Ai e cilësoi Kosovën si shtetin më demokratik në rajon dhe më gjerë, të bazuar në bindjen se të gjithë njerëzit janë të lirë dhe të barabartë, pavarësisht vendit ku janë rritur apo komunitetit të cilit i përkasin.