Kurti i kërkon Danimarkës përkrahje për avancimin e aplikimit të Kosovës drejt statusit kandidat në BE

Gjatë një takimi lamtumirës me ambasadorin jo rezident të Danimarkës, Christian Grønbech-Jensen, kryeministri Albin Kurti kërkoi mbështetjen e këtij shteti për avancimin e aplikimit të Kosovës për anëtarësim në Bashkimin Evropian.

Kurti bëri të ditur se në takim u diskutua për marrëdhëniet mes Kosovës dhe Danimarkës, si dhe për mundësitë e forcimit të mëtejshëm të tyre.

“Duke shprehur mirënjohje ndaj Danimarkës, kërkova mbështetje për të avancuar statusin e aplikimit të Kosovës në shtet kandidat për anëtarësim në Bashkimin Evropian”, ka shkruar Kurti.

Kryeministri theksoi gjithashtu se Kosova mbetet e angazhuar për realizimin e objektivit të saj strategjik për anëtarësim në NATO.

“Republika jonë, përveçse e përcaktuar qartë dhe e palëkundur, është e përkushtuar në synimin strategjik për t’u bërë pjesë e NATO-s”, ka shkruar ai.

Kurti tha se e falënderoi ambasadorin Grønbech-Jensen për shërbimin dhe kontributin e dhënë. Sipas tij, diplomati danez i përcolli urime Qeverisë dhe mandatit të ri.

Ai e uroi ambasadorin edhe për marrëveshjen e arritur me Shtetet e Bashkuara të Amerikës dhe Grenlandën, e cila synon forcimin e mbrojtjes dhe sigurisë në Arktik dhe Atlantikun e Veriut.

“Krahas drejtësisë, energjisë, arsimit e teknologjisë, biseduam për mënyrat dhe mundësitë konkrete të thellimit të bashkëpunimit ekonomik dhe tregtar, si dhe për rritjen e investimeve daneze në vendin tonë”, ka shkruar Kurti.