Kurti dhe kongresisti Joe Wilson diskutojnë në New York për forcimin e partneritetit Kosovë-SHBA

Kryeministri i Kosovës, Albin Kurti, bëri të ditur se gjatë qëndrimit në New York është takuar me kongresistin amerikan Joe Wilson. Në qendër të bisedës ishte zgjerimi i bashkëpunimit mes Kosovës dhe Shteteve të Bashkuara.

Takimi u zhvillua gjatë Javës së Nivelit të Lartë të sesionit të 81-të të Asamblesë së Përgjithshme të Kombeve të Bashkuara. Wilson është bashkëkryesues i Komisionit të Helsinkit të SHBA-së dhe anëtar i Komisioneve për Punë të Jashtme dhe Forcat e Armatosura të Dhomës së Përfaqësuesve.

Kurti theksoi se Shtetet e Bashkuara mbeten aleati më i rëndësishëm i Kosovës, ndërsa partneriteti me Washingtonin është thelbësor për sigurinë, zhvillimin dhe perspektivën euroatlantike të vendit.

Sipas tij, në takim u trajtuan çështje që lidhen me sigurinë dhe mbrojtjen, investimet dhe sundimin e ligjit. Palët biseduan edhe për synimin e Kosovës për anëtarësim në NATO, forcimin e bashkëpunimit me SHBA-në dhe partneritetin e Forcës së Sigurisë së Kosovës me Gardën Kombëtare të Iowa-s, i cili vijon që nga viti 2011. Kurti tha se Kosova, nga një konsumuese, është shndërruar në kontribuuese në sigurinë ndërkombëtare.

Një pjesë e diskutimit iu kushtua situatës së sigurisë në Ballkanin Perëndimor, ruajtjes së orientimit euroatlantik të rajonit dhe pjesëmarrjes së Kosovës në organizatat ndërkombëtare. Me Wilsonin, i cili është aktiv edhe në Asamblenë Parlamentare të OSBE-së, u diskutua gjithashtu për synimin e Kosovës për të avancuar drejt pjesëmarrjes së plotë në OSBE.

Kurti tha se vëmendje të posaçme morën çështjet që prekin shqiptarët e Preshevës, Bujanocit dhe Medvegjës, përfshirë përfaqësimin e pamjaftueshëm në institucionet publike, polici, gjyqësor dhe shëndetësi. Në takim u fol edhe për pasivizimin e adresave, pengesat për arsimin në gjuhën shqipe dhe mosnjohjen e diplomave të fituara në Kosovë.

I shoqëruar nga deputeti nga Bujanoci, Shaip Kamberi, dhe kryetarja e Komunës së Preshevës, Ardita Sinani, Kurti kërkoi që të drejtat e shqiptarëve në Luginën e Preshevës të mbrohen nga Komisioni i Helsinkit dhe shkeljet e tyre të trajtohen në komunikimet me Beogradin.

Në përfundim, kryeministri e falënderoi kongresistin Wilson për mbështetjen ndaj Kosovës dhe angazhimin e tij për sigurinë, demokracinë dhe të drejtat e njeriut në rajon. Po ashtu, ai e ftoi kongresistin amerikan të vizitojë sërish Republikën e Kosovës, së bashku me një delegacion të Kongresit amerikan.