Kryetarja Haxhiu pa ekspozitën “Dalja N’dritë” të fotografit Hazir Reka

Albulena Haxhiu, kryetare e Kuvendit të Republikës së Kosovës, e vizitoi sot ekspozitën personale “Dalja N’dritë” të fotografit Hazir Reka.

Fotot sjellin në fokus vitet 1988–1989, demonstratat qytetare, grevat e minatorëve dhe një popull që, sipas kryetares Haxhiu, edhe kur i merrej zëri institucional, dinte të shprehej me këmbëngulje, me revoltë dhe me dinjitet.

Një nga pikat më të rëndësishme të ekspozitës është greva historike e minatorëve të Trepçës. Sipas kryetares së Kuvendit, ata burra, në thellësi të nëntokës, e ngritën lart ndërgjegjen e një vendi të tërë, duke u kthyer në zërin e Kosovës në ditët kur liria kërkonte guxim, sakrificë dhe qëndresë.

“Kjo ekspozitë është dëshmi dhe dokumentim i qëndresës dhe sakrificës së shumë brezave në rrugëtimin e Kosovës drejt lirisë dhe shtetndërtimit. Fotografitë nga Hazir Reka shërbejnë si një arkiv i çmuar i kujtesës sonë kolektive, duke na kujtuar rëndësinë e ruajtjes së historisë dhe nderimit të atyre që kontribuan në momentet vendimtare të vendit tonë”, theksoi kryetarja Haxhiu.