Kosova kërkon zgjerimin e partneritetit me vendet e Paqësorit

Zëvendëskryeministri i Parë dhe Ministri në detyrë i Punëve të Jashtme dhe Diasporës i Republikës së Kosovës, Glauk Konjufca, ndodhet në Koror të Palaut, ku po merr pjesë në Takimin e 55-të të Liderëve të Forumit të Ishujve të Paqësorit (PIF), i cili zhvillohet nga 30 gushti deri më 4 shtator 2026.

Ministria e Punëve të Jashtme dhe Diasporës bën të ditur se prania e Kosovës në këtë forum synon të thellojë raportet me shtetet e Paqësorit, të rrisë angazhimin diplomatik të vendit në këtë hapësirë dhe të çojë përpara bashkëpunimin në fusha me interes të ndërsjellë.

Gjatë vizitës në Palau, Konjufca pritet të takohet me drejtues shtetesh e qeverish, ministra të jashtëm, si edhe me zyrtarë të tjerë të lartë nga vendet pjesëmarrëse.

Në axhendën e forumit janë përfshirë diskutime mbi qëndrueshmërinë ekonomike, klimën, administrimin e oqeaneve dhe peshkimit, sigurinë rajonale, reformimin institucional dhe forcimin e unitetit mes vendeve të Paqësorit.

Sipas njoftimit, Republika e Kosovës e konsideron me rëndësi globale agjendën e Paqësorit të Kaltër dhe shpreh gatishmërinë për të dhënë kontribut, në përputhje me kapacitetet e saj dhe nevojat e vendeve të rajonit, në qëndrueshmërinë klimatike, përgatitjen për fatkeqësitë, zhvillimin e qëndrueshëm dhe ruajtjen e burimeve natyrore.

Takimet dypalëshe dhe aktivitetet e zhvilluara në kuadër të samitit pritet të shërbejnë për konsolidimin e lidhjeve të krijuara, hapjen e partneriteteve të reja dhe zgjerimin e bashkëpunimit me shtetet e Paqësorit.

Ndër temat e bashkëpunimit që pritet të marrin vëmendje janë arsimi, forcimi i kapaciteteve të administratës publike, siguria, zhvillimi digjital dhe shkëmbimet mes institucioneve.

Po ashtu, në fokus do të jenë diplomacia kulturore, lidhjet akademike dhe kontaktet e drejtpërdrejta mes qytetarëve.

MPJD-ja thekson se pjesëmarrja në Samitin e PIF-it dëshmon vullnetin e Republikës së Kosovës për të ndërtuar një angazhim më të fuqishëm dhe të qëndrueshëm me rajonin e Paqësorit, mbi bazën e respektit të ndërsjellë, interesave të përbashkëta, solidaritetit dhe partneriteteve afatgjata.