Konjufca pret raportuesin e PE-së për Kosovën Riho Terras, në fokus integrimi në BE

Glauk Konjufca, zëvendëskryeministër i Parë në detyrë dhe ministër i Punëve të Jashtme dhe Diasporës, ka zhvilluar një takim me eurodeputetin Riho Terras, raportuesin e përhershëm të Parlamentit Evropian për Kosovën.

Sipas njoftimit të Ministrisë së Punëve të Jashtme dhe Diasporës, në këtë takim është biseduar për zhvillimet politike në vend, krijimin e institucioneve të reja pas zgjedhjeve parlamentare, si edhe për rrugëtimin e Kosovës drejt integrimit evropian dhe euroatlantik.

Gjatë bisedës, Konjufca ka çmuar kontributin e Parlamentit Evropian në mbështetje të synimeve evropiane të Kosovës dhe njëkohësisht e ka falënderuar eurodeputetin Terras për përfshirjen e tij në raport me zhvillimet në vend.

Në takim u nënvizua edhe rëndësia që kërkesa e Kosovës për anëtarësim në Bashkimin Evropian të trajtohet me vëmendjen e duhur, në mënyrë që të hapet rruga për avancimin e statusit të vendit kandidat dhe fillimin e negociatave për anëtarësim.

Ministria bëri të ditur se Kosova vazhdon të jetë e përkushtuar ndaj avancimit të agjendës evropiane, thellimit të bashkëpunimit me institucionet e BE-së dhe përmbushjes së kritereve të nevojshme për integrim të plotë në Bashkimin Evropian.