Koloneli amerikan Miller: Trupat tona janë gati të bashkëpunojnë me aleatët e NATO-s për sigurinë në Kosovë

Koloneli amerikan Jabari Miller, i cili ka marrë drejtimin e Komandës Rajonale-Lindje të KFOR-it, tha se ushtarët amerikanë janë gati të bashkëpunojnë me aleatët dhe partnerët e NATO-s për të ruajtur sigurinë dhe qëndrueshmërinë në Kosovë.

Në një prononcim për revistën ushtarake “Stripes”, Miller tha se trupat janë në gjendje të mirë fizike, të motivuara, të disiplinuara dhe të trajnuara për ta përmbushur këtë detyrë së bashku me aleatët dhe partnerët e NATO-s.

Drejtimin e Komandës Rajonale-Lindje e kanë marrë ushtarët amerikanë të Regjimentit të Dytë të Kalorësisë dhe njësitë mbështetëse të Divizionit të Parë të Këmbësorisë, me seli në Gjermani. Sipas Ushtrisë Amerikane për Evropën dhe Afrikën, dorëzimi i komandës u zhvillua të hënën në një ceremoni në kampin Bondsteel, në Kosovë.

Komanda iu dorëzua trupave amerikane në detyrë aktive nga Brigada e 53-të e Këmbësorisë e Gardës Kombëtare të Floridës. Është hera e parë që nga shtatori i vitit 2014 që ushtarë amerikanë në detyrë aktive rikthehen në drejtimin e saj.

Zëdhënësi i komandës, rreshteri i shtabit Hunter Tate, tha se ndërrimi i udhëheqjes lidhet me disponueshmërinë e tanishme të forcave dhe nevojat e misionit.

Ky ndryshim ndodh ndërsa janë paralajmëruar reduktime të trupave të KFOR-it, si pjesë e përshtatjes së pranisë ushtarake me përmirësimin e gjendjes së sigurisë në Kosovë.