KEK sqaron: Marrëveshja me JSC ESM lidhet vetëm me shitjen e qymyrit

Korporata Energjetike e Kosovës (KEK) ka hedhur poshtë pretendimet se kontrata e lidhur me JSC ESM për shitjen e qymyrit përfshin koncesionimin e qymyrit, minierave, aseteve apo resurseve të saj.

Sipas sqarimit të korporatës, marrëveshja ka një objekt të vetëm: shitjen e qymyrit. Çmimi i përcaktuar është 24.4 euro për ton, pa TVSH, ndërsa kontrata zgjat 36 muaj dhe mund të arrijë vlerën deri në 73.2 milionë euro.

“Kontrata nuk përmban asnjë dispozitë për koncesion mbi qymyrin, minierat, asetet apo resurset e KEK-ut. Objekti i saj është i qartë: SHITJA E QYMYRIT”, thuhet në reagimin e KEK-ut.

Korporata ka bërë të ditur se kontrata, së bashku me dosjen e tenderit, është e publikuar në platformën E-Prokurimi të Komisionit Rregullativ të Prokurimit Publik, ku mund ta shqyrtojnë dhe verifikojnë të gjithë të interesuarit.

KEK-u sqaron gjithashtu se shitja do të bëhet drejtpërdrejt te përdoruesi përfundimtar, pa përfshirjen e ndërmjetësuesve.

Ndërkohë, korporata nuk ka marrë përsipër eskavimin, transportin dhe veprimtaritë logjistike që lidhen me tërheqjen e qymyrit.

“Kjo e ndan zbatimin e kontratës nga proceset operative të Korporatës dhe siguron që shitja e kësaj sasie qymyri të mos ndikojë në operacionet minerare, furnizimin e termocentraleve me qymyr apo prodhimin vendor të energjisë elektrike”, thuhet më tej në reagim.

KEK-u ka nënvizuar se furnizimi i termocentraleve vazhdon të jetë “prioritet absolut”. Në këtë kuadër, paraqitjen e marrëveshjes si koncesion e ka cilësuar të pabazë dhe të papajtueshme me përmbajtjen reale të dokumentit.

“Transparenca është obligim. Faktet mund të verifikohen. Kontrata është publike. Në kontratë nuk ka koncesion”, përfundon reagimi i Korporatës Energjetike të Kosovës.