Kanosja ndaj Albin Kurtit, Kadri Xhemaili dënohet me gjashtë muaj burg

Kadri Xhemaili është dënuar me gjashtë muaj burgim për kërcënimin publik ndaj kryeministrit në detyrë të Kosovës, Albin Kurti.

Dënimi u shqiptua pasi Xhemaili pranoi fajësinë gjatë seancës gjyqësore të zhvilluar të premten dhe shprehu pendesë për veprimin e kryer.

Gjykata e ka aprovuar marrëveshjen për pranimin e fajësisë, të lidhur mes të pandehurit, avokatit të tij dhe Prokurorisë.

Prokurori Bekim Kodraliu tha se marrëveshja ishte arritur në mënyrë vullnetare dhe se Xhemaili ishte informuar për pasojat që sillte pranimi i fajësisë. Avokati i tij, Rinor Arifi, deklaroi se mbrojtja pajtohej me marrëveshjen.

Albin Kurti nuk mori pjesë në seancë. Gjyqtari Rrahman Beqiri bëri të ditur se kryeministri në detyrë e kishte pranuar ftesën për të qenë i pranishëm, por nuk kishte dhënë arsye për mungesën.

Aktakuza e lidh rastin me një publikim të bërë nga Xhemaili më 22 tetor 2025 në rrjetin social Facebook, ku ai kishte kanosur Kurtin me synimin për ta frikësuar në cilësinë e kryeministrit të Kosovës. Sipas aktakuzës, kërcënimi përfshinte edhe privimin nga jeta.

Pas pranimit të fajësisë dhe miratimit të marrëveshjes me Prokurorinë, Gjykata vendosi që Kadri Xhemaili të vuajë gjashtë muaj burgim.