Jeton Sopa reagon ndaj Abdixhikut: Kreu i LDK-së kuptoi agjendat e Beratit dhe Baton Stanishiqit

Analisti Jeton Sopa ka reaguar pas deklaratave të kryetarit të Lidhjes Demokratike të Kosovës (LDK), Lumir Abdixhiku, lidhur me mundësinë e mbajtjes së zgjedhjeve të reja.

Sopa ka thënë se Abdixhiku më në fund ka reflektuar dhe ka kuptuar burimin e qëndrimeve që po nxisin zgjedhje të jashtëzakonshme.

“E preka hundën se po tutna po i b’i t’mësyesh. Ma n’fund paska reflektu dhe i paska kuptu kryetari i LDK-së, Lumir Abdixhiku, agjendat që dalin nga thellësia e bunarit të Beratit dhe Baton Stanishiqit”, ka shkruar Sopa.

Abdixhiku deklaroi se LDK-ja nuk e konsideron shkuarjen në zgjedhje të reja si zgjidhje, ndërsa theksoi se shumica e anëtarëve të partisë nuk janë në favor të zgjedhjeve të jashtëzakonshme.

Sipas tij, ideja për një proces të ri zgjedhor po shtyhet nga persona jashtë LDK-së, si dhe nga disa rryma brenda Partisë Demokratike të Kosovës (PDK).

“Unë nuk e mendoj se duhet të shkojmë në zgjedhje ne dhe, me aq sa e kam kuptuar, shumica e LDK-së nuk duan të shkojnë në zgjedhje të reja”, deklaroi Abdixhiku.

Kreu i LDK-së akuzoi publicistin Baton Haxhiu dhe gazetarin Berat Buzhala se po mbështesin një agjendë që synon organizimin e zgjedhjeve të jashtëzakonshme.

“Kjo nuk është agjendë e LDK-së, kjo është agjendë e Baton Haxhiut dhe Berat Buzhalës. Këta me akterë radikalë të PDK-së kanë këtë agjendë, tash e tri javë flasin për të shkuar në zgjedhje të jashtëzakonshme”, u shpreh ai.

Abdixhiku shtoi se edhe opinionet e shprehura brenda LDK-së për zgjedhjet e reja janë ndikuar nga këto rryma.

“Mendime për të shkuar në zgjedhje janë të ndikuara prej këtyre rrymave”, tha kryetari i LDK-së.