Abdixhiku akuzon Haxhiun dhe Buzhalën: Thirrja për zgjedhje nuk pasqyron vullnetin e shumicës së LDK-së

Kryetari i Lidhjes Demokratike të Kosovës, Lumir Abdixhiku, ka hedhur akuza të rënda ndaj Baton Haxhiut dhe Berat Buzhalës, duke theksuar se kërkesa për zgjedhje të jashtëzakonshme nuk përfaqëson qëndrimin e shumicës së anëtarëve të LDK-së.

Gjatë një interviste për emisionin “Adresa” në Kanal 10, ai u shpreh se pjesa dërrmuese e anëtarësisë së partisë që drejton nuk e mbështet idenë e zgjedhjeve të reja.

Sipas tij, prej disa javësh kjo ide për ta çuar sërish vendin në zgjedhje po promovohet nga Haxhiu dhe Buzhala, në bashkëpunim me rryma që ai i cilësoi si radikale brenda PDK-së.

Abdixhiku më tej pretendoi se qëllimi i kësaj axhende është krijimi i një blloku të gjerë opozitar, ku LDK-ja do të mbante një rol të varur.

Kundërshtimi i tij ndaj një bashkimi të tillë u mbështet në dallimet mes elektoratit të LDK-së dhe atij të PDK-së. Sipas tij, një afrim i kësaj natyre nuk do t’i kalonte votat e LDK-së te partitë e tjera të opozitës, por do t’i drejtonte ato drejt Vetëvendosjes.

Këto deklarata vijnë në një kohë kur brenda LDK-së ka përplasje të forta për qasjen që duhet ndjekur lidhur me zgjedhjen e presidentit dhe mundësinë e mbajtjes së zgjedhjeve të reja në Kosovë.