Hill për mundësinë e mbylljes së Gjykatës Speciale: Nuk e di, avokatët duhet të përcaktojnë hapat e ardhshëm

Christopher Hill, ish-i dërguari i Shteteve të Bashkuara të Amerikës në Kosovë, ka reaguar lidhur me zhvillimet e fundit në proceset gjyqësore ndaj ish-krerëve të UÇK-së në Gjykatën Speciale, duke shprehur zhgënjimin e tij për vendimin e fundit të institucionit.

I pyetur nëse ekziston mundësia që kjo gjykatë të shpërbëhet, Hill deklaroi se përgjigjja duhet kërkuar te një specialist i së drejtës ndërkombëtare.

Sipas tij, në këtë moment mbrojtja duhet të përqendrohet te përcaktimi i veprimeve që do të ndërmerren në vijim të procesit.

“Kjo është një pyetje ligjore që po i drejtohet një diplomati, ndaj do të ishte më e përshtatshme të konsultoheshit me një jurist të së drejtës ndërkombëtare. Nuk e di përgjigjen, vërtet nuk e di. Ajo që mund të them është se avokatët e mbrojtjes duhet të hartojnë hapat e tyre të ardhshëm.

Po ashtu, është e nevojshme të gjendet një zgjidhje për këtë situatë, e cila duhet të përcaktohet nga drejtësia dhe të jetë në përputhje me faktet.

Shpresoj që procesi të vijojë në një drejtim pozitiv. Sikurse shumë njerëz të tjerë, edhe unë jam thellësisht i zhgënjyer nga vendimi që Gjykata Speciale ka marrë vitet e fundit”, tha Hill.