Christopher Hill: E kuptoj zhgënjimin dhe zemërimin e qytetarëve në Kosovë pas vendimit të Speciales

Ish-i dërguari i Shteteve të Bashkuara të Amerikës në Kosovë, Christopher Hill, ka komentuar reagimet pas vendimit të fundit të Gjykatës Speciale ndaj ish-krerëve të UÇK-së, duke thënë se i kupton zhgënjimin, mllefin dhe zemërimin e qytetarëve.

Gjatë një interviste për media, Hill u shpreh se një vendim i tillë mund të shkaktojë natyrshëm mërzitje dhe zhgënjim. Ai gjithashtu tha se ndien empati për ata persona që e vlerësojnë vendimin si të padrejtë ose të gabuar.

Sipas tij, qytetarët duhet të përqendrohen më shumë te mërzitja që ka shkaktuar vendimi dhe më pak te zemërimi, ndërsa vëmendja kryesore duhet t’i kushtohet hapave të ardhshëm të palës mbrojtëse.

Hill theksoi se rëndësi ka përcaktimi i veprimeve dhe i rrugës që duhet të ndjekë mbrojtja, si edhe arritja e rezultatit më të mirë të mundshëm për personat në Kosovë.

Ai shtoi se zemërimi dhe mllefi ndaj organizatave ndërkombëtare nuk do të ishin të dobishme në këtë situatë.

“Mendoj se mërzitja dhe zhgënjimi janë reagime të natyrshme ndaj këtij vendimi. Unë shpreh empatinë time për këta njerëz, të cilët besojnë se vendimi është i gabuar. E kuptoj shumë mirë mllefin dhe zemërimin e tyre, si dhe barrën shumë të madhe që po përballojnë.

Doja t’u thosha njerëzve që të ndalen më shumë te mërzitja sesa te zemërimi. Tani duhet të shqyrtohet se çfarë i nevojitet palës mbrojtëse, cili është veprimi dhe rruga e duhur që ajo duhet të ndjekë, si dhe cili mund të jetë rezultati më i mirë për personat në Kosovë. Nuk mendoj se zemërimi dhe mllefi ndaj organizatave ndërkombëtare janë të dobishme”, tha ai.